تاج النمر و الصقر

التاج ده جالنا من ايمي و كوكا

من مدونة كلو ماشي

احنا كمان بالمرة هنقتبس طريقة الاجابة

ده لون اجابات نوشة و ده لون اجابات شمس
لو مكنتش مصري بس عربي كانت هتبقى إيه نظرتك للمصريين واللي بيحصل في مصر دلوقتي؟
ملحوظة :ــ أحب أقول إني أول مرة أرد على تاج لأني بصراحة مش متعود إني أرد على التاجات

ولكن نظراً لإنه جاي من إيمي وكوكا فمقدرش إني مردش على التاج

وبالنسبة لأول سؤال :ــ كان المصريين هيبقوا صعبانين عليا من الظلم والفساد اللي موجودين فيه

وكان هيبقى نفسي أعمل أي حاجة ولو بسيطة جداً لإصلاح الفساد في مصر

لو مكنتش مصري او عربي هبص للعرب و المصريين و اقول

اتفووووووووووووو على ناس اتولدت ربنا وهبها نعمه العروبة و المصرية و مش مقدرنها

عشان لو اي مصري او عربي لو مقدر النعمة دي كان حب وطنه اكتر من كدة

لوكنت أوروبي أو غير مسلم هتبقي إيه نظرتك للعرب والمسلمين؟

أنا أفخر جداً إني مسلم وبالأخص عربي ولو صادفني مجرد الصدفة إني مكنتش مسلم أو مكنتش عربي

وبنفس طبيعتي وشخصيتي كنت هقول إن المسلمين مش عايزين غير السلام والحب مع كل الناس

وبالنسبة للعرب هقول عليهم إنهم راضخين للأوامر السياسية المحيطة بيهم من غير أي مقاومة أو اعتراض

كلمة الشيخ محمد عبده او الشيخ الشعراوي معرفش مين اللي قالها الاول عندما سافروا اوربا

رايت في بلاد الغرب اسلام بلا مسلمين و في بلاد العرب مسلمين بلا اسلام
لوقالولك إنت بقيت رئيس جمهورية هتعمل إيه؟

هحل كل القوى السياسية في البلد اللي بحكمها وهمحي الفساد اللي موجود بكل أشكاله وصوره

وهنزل للناس بنفسي أبقى بينهم أشوف همومهم ومطالبهم واللي بيحلموا بيه وبيتمنوه وخاصة الشباب

وهحاول بكل الطرق أشيل فرق الطبقات الموجودة بين الناس

ولن أرضخ أو أتهاون في أي قرار فيه مصلحة للبلد دي تحت أي ظغط كان

يالهوووووووووووووووووووووووي

اول حاجة و دة لازم هعتقل نوشة

و بعد كدة الغي الاحزاب كلها

و اعمل حزب واحد زي الحزب الاشتراكي ايام عبد الناصر

و شروط دخول الحزب شرطين

اولا: مدة العضوية لا تزيد عن سنتين

ثانيا : لازم العضو يبقى عاطل

لوسمح لك برؤية الرسول عليه الصلاة والسلام وإنك تقوله كلمة واحدة ؟

اللهم بلغنا صحبتك الشريفة

عشان ما ينفعش اقول الا كلمة واحدة

فانا هفضل اعيط و عشان الكلام اللي عندي كتير

و صلي الله علية و سلم من دموعي هيفهم كل كلمة عايز اقولها
لو كنا في عصر ازدهار الأندلس كنت تتخيل نفسك إزاي؟

فارس من الفرسان الأقوياء الواقفين ضد أي حروب أو ظلم أو فساد
يعني ممكن تقول زي

حسن ابن الهيثم

ابن رشد
لو خطبت واحدة أو اتخطبتي لواحدوأثناء الخطبة اكتشفت أو اكتشفتي إن الطرف الآخرغير قادر على الإنجاب هيكون ايه تصرفك؟

موضوع الإنجاب ده بيد الله وحده ولو ده قدري وقدرها مع بعض يبقى قدر الله وما شاء فعل

ولكن برده هعرض عليها إني أتجوز تاني ويكون الجواز ده برضاها وتكون هي اللي جايباها ليا كمان

علشان ميكونش في الجواز ده ظلم ليها أو ظلم ليا
لو هي البنت فعلا اللي بتمناها يعني مش جواز تقليدي

هتجوزها بسرعة لازي عارف انه مش ذنبها

و هنأمل في كرم الخالق ثم العلم و العلماء
لو طلعت القمر هتكتب عليه ايه؟
ليت كل ما يتمناه المرء يدركه

من شمس الزناتي المسلم المصري الي الكون

اللهم اني ادعوكم للايمان بمعاني الانسانية

بمعاني الاسلام

بمعاني المصرية

مع تحياتي

شمس الزناتي

( و الله مش قصير و لا حاجة )

لو مررت التاج لحد وماجاوبش هتعمل ايه؟

أنا عن نفسي مش هقدر أقول أي حاجة لإني مش بجاوب على تاجات من الأساس

هرفع ايدي للسما و اقول تشوف اللي انا شايفة دلوقتي و النت يقطع عندك بسبب الحكومة
تمرر التاج لمين

feeling - رانيا
منى المحمودي
battabakr_bentelislam
الانسان - عادل نجم
احكي و هسمعك - ريهام
ربة السيف و القلم - شمس
حكايتنا - علاء

عايشة و خلاص : جريئة جدا
هواجس بس شغلاه - محمد جادو
الشريف جمال طه
مكان فى القلب - اوشا
انا بحبك يا مصر - الجيزاوي
حين البأس - منذر
عشانك يا مصر - سارة
حاجات ملخبطة جواها - شاهنده
الشاعر - اخواني بس بحبه
جيم اوفر مارو
No Fear- محمد جمعة
جبهة التهييس - استاذتي نوارة
محمد مفيد ــ أبو عبد الله وعبد الرحمن
ما علينا

-----------------------

نوشة شمس الزناتي

دة بقى اللي نوارة استفسرت عنه

دة يا جماعة اللي نوارة نجم و هي استاذتي استفسرت عنه

هتقلي هو اية

هقولك هو حكاية صغيرة نسمعها مع بعض

بس لازم تكملها للاخر يمكن تستفيد و يمكن تقعد تعيط

و يمكن تقفل المدونة و تمشي لكن الاكيد انك لازم هتفهم و هتعرف حاجة مهمه موجودة في مصر و في العرب

-

-

-

-

على راي عبد الحليم نبتدي منين الحكاية

هنبتدي من المحاسب الشريف / جمال طة على فكرة للي ميعرفش لقب الشريف نسبة الي تحدر النسب من النبي علية الصلاة و السلام

نكمل الراجل دة يا جماعة و لانة محاسب زي كل المصريين في سنه و في عصرة خد بعضة و توجة للسعودية يشتغل هناك و يكون نفسه و هناك اشتغل في احد البنوك و اثبت نجاحه في عمله و دة اللي يأهله ان ينتقل الي بنك اخر و برضة كعادة اي مصري اثبت نجاحة في عمله بشدة و الشئ الطبيعي لانه عايز يبقى انسان عيشته مرتاحة فكر انه يعمل مشروع و هنا بقى تلاقي العقبة

تقلي فية اية

انا اقلك ان القانون السعودي بيمنع امتلاك غير المصري في السعودية طب الراجل يعمل اية

يقتل طموحاته

يحط احلامه في علبة و يرميها في البحر

لا طبعا الراجل فكر انه يستعين بالكفيل بتاعة و يعمل المشاريع باسمه على ان يكون فية بينهم ورق يثبت انه هو صاحب الاملاك دي و بالفعل الشريف / جمال طه فتح صيدليات ادوية و بدأ يتاجر و تزدهر تجارتة

( الناس اللي قلتلها هنتعلم حاجة ادينا بنتعلم ان انت لا تتنازل عن حلمك )

و في يوم من الايام كان يوم منيل ما طلعتلوش لا شمس و لا قمر نزل عمنا جمال او بالمعني الاصح جدو جمال اجازة لمصر بلدة تقدر تقول ان الكلام دة سنة 1992 قضي اجازته السعيدة في مصر و رجع السعودية بلد الاسلام و الحق و العدل و الانصاف ( كل دة تريقة ) و الحمد لله لقى كل حاجة تساوي مفيش

ازاااااااااااااااااااي

انا اقلك ازاي متستعجلش بكل بساطة مكتبه مكسر و اوراقه مسروقة و لا يوجد سند يثبت ان الاملاك دي بتاعته يعني من الاخر شقي عمره ضاع و اصبح لا يمكلك شئ

طبعا انا هحاول دلوقتي اتصور الموقف واحد في بلد غريبة لا لية عزوة و لا ناس و لا اهل

و اصبح لا يمكلك مال و لا اي شئ يعمل اية ؟؟؟؟؟؟؟؟؟؟؟؟؟؟؟

طبعا الباشا اللي هيقول لنفسه عوضنا على الله يقفل المدونة و يمشي عشان ما يتعبنيش

عم جمال امن بقول رسول الله علية الصلاة و السلام " من مات دون ماله فهو شهيد " و صمم يدافع عن حقة

طبعا هو صمم يرجع حقة و المبدأ و المقولة اللي هو مشي بيها قلناه

هتقلي طب كان مبدأ السعوديين اية

اقلك المبدأ القائل " انا و اخويا على ابن عمي و انا و ابن عمي على الغريب " مبدأ واطي عارف و الله بس هما اتبعوه و نسيوا قول رسول الله صلى الله علية و سلم عندما سئل

كيف انصر اخي ظالماً

قال

ادفعة عن ظلمة

قعد الشريف / جمال يناضل عشان حقة من 2/11/1992 م و حتى تاريخ 8/5/2005 م طبعا تقلي

و في الوقت دة كله كان بيعمل اية

الخصلك الموضوع انه في الوقت دة اتسجن اربع مرات بدون اي تهمه و فضل يناضل مع الطريق الوحيد اللي قدامه اللي هو القضاء و القضاء يماطل و السلطات السعودية تزور لحد ما رجع مصر 8/5/2005 م و هو لسة ما اخدتش حقة بس رجع

رجع بلده يعيش في وسط اهله و ناسه على الاقل مطمن انه في بلده مش هيتعذب في بلد غريب

مع ان و الله يا عم جمال المصريين برة و جوة متعذبين

الراجل دة يا جماعة بالرغم من انه عن عمر يناهز الـ 57 سنة إلا انه عنده صبر و اراده للدفاع عن حقة

طبعا بعد البوست الطويل دة انا برضة زي كل بوست هقول انا كتبت دة كله لية

عشان مينفعش ابدا لاي حر مهما كان و انا عارف قد اية عالم المدونين مليئ بالاحرار انه يشوف حد بيطلب التضامن و لا يتضامن معاه و اللي طمني لكدة هو تضامن مدونين احرار مع قضية الشريف / جمال طه و كان منهم

نوارة نجم

مارو
بنت الاسلام
سارة

نوشة
طبعا مش محتاج اقول اني متضامن و إلا انا بكتب دة كله لية لكن اللي محتاج اقوله

هو لما كلمت المدونة الرائعة بنت الاسلام و قلتلها عايزين نبدأ بحملة للتضامن مع الشريف جمال طه ردت رد رائع و قالت

البداية عندك يا زعيم

عشان كدة يا جماعة احنا بدأنا

انا عرضت عليكوا الموضوع و عشان زي كل مرة اعرض مصدقية كلامي

دي مدونات الضحية / جمال طه

http://gamal51.blogspot.com/

http://alsharefgamal.jeeran.com/

http://alsharefgamal.ektob.com/

هتلاقوا فيها مستندات رسمية و تفصيلية باللحظة و الثانية لكل كلمة انا قلتها ياريت كل مدون حر و كل مصري حر يقراها و هتبع نفس اسلوب استاذتي نوارة و هطالبكم بالتضامن معاه

و دة يا جماعة لنك جروب التضامن مع جمال طه

http://www.facebook.com/group.php?gid=15133850514

انا بقدم شكري لكل اللي اشتركوا في الجروب دة

بس احنا محتاجين دعم كل الناس و تأييدها

فاضل طبعا حاجة واحدة بس مقلتهاش

مع تحياتي

------------------------

شمس الزناتي

-----------------------

ليتوفاها الله برحمته

انا لله وانا اليه راجعون
انتقلت الى رحمة الله تعالى
المدونة داليا عز
صاحبة بلوج روقااان الكلمات
http://www.rw2aan.blogspot.com/
وبلوج بنت النيل
http://www.bent-elneel.blogspot.com/
وهي صاحبة الفضل بعد الله سبحانه وتعالى
في انشاء اتحاد المدونين العرب
http://www.arabub.blogspot.com/
ويجعل الله هذا من صالح اعملها
في محاولتها الناجحة في توحيد العرب
او توحيد ايادي الكثير من الشباب
ذات الفكر الواحد
وجعل الله هذا من ميزان حسناتها

----------------------------

نوشة ، شمس الزناتي

--------------------

الجيزاوي اتقبض علية

بداية اخواني دعت حركة مصريين ضد التعذيب بالتضامن مع كفاة و يلا نفضحهم الي وقفة احتجاجية امام قسم العمرانية بالهرم و قد كانت بدايتها في تمام الساعة السادسة

يوم الخميس 15/11/2007 م

و قد تم اجهاد الوقفة الاحتجاجية من قبل الامن

مما حدا بالااعلامية بثينه كامل الي الاصرار على اشعال الشمع و اضهار لاوقفة الاحتجاجية مما ادي الي احتكاكها بالانم و اجبار الامن لها على مغادرة المكان و اثناء حدوث ذلك كانت المدونة الفكر السجين تقوم بصوير ما يحدث الذي ادي لاي صدور فلاش من الكاميرا الخاصة بها

و عندما راي الامن ذلك قاموا بالاجهاز عليها لمصادرة الكاميرا مما ادي الي تدخل المدون احمد الجيزاوي لحمايتها و تنج عن ذلك

القبض على الجيزاوي نم قبل الامن و مصادرة الحقيبة الشخصية و الكاميرا الخاصين بالمدونة الفكر السجين و قد تمكن الوسطاء من استرداد حقيبة و كاميرا المدونة الفكر السجين و لازال المدون الجيزاوي قيد الانم

و حتى الان لا اخبار عه إلا ان تليفونة المحمول بين حين و اخر مرة مفتوح و مرة مغلق

و سنوافيكم باخر الاخبار و نرجو من الله خروج الجيزاوي في اقرب وقت

-----------------------------------------------------

تحديث

الجيزاوي خرج و في امان لكن مدونته اتحجبت ما ادى به الي عمل مدونة اخرى لعى نفس اللنك

---------------

شمس الزناتي

---------------

انت اكيد مش في مصر

الحمد لله و الشكر لله انا ضامن ان كل من شاف اعلان الحزب الوطني عن المؤتمر المنيل بتاعه

مش بيقرا البوست دة عشان اي حد شاف الاعلان زمانه بيتعالج من الضغط من السكر

بس انا بصراحة مخدش الموضوع على اعصابي

انا لقيتهم بيقولوا في زراعة جميلة و صناعة متطورة و فرص عمل كتير و شباب زي الفل

اه و الله و البدل و الكرفتات عليها عسل

و لا الكباري المنورة و الميادين النظيفة و المصانع المتطورة اللي شغاله

انا طبعا شفت الاعلان فرحت جدا بس قلت انا اكيد مشغل قناه مش مصرية

اكيد دة مش في مصر

حاولت اتأكد لقيت مكتوب عليها المصرية الاولي قلت بس يبقى الدش عندي بايظ

اصل كل الاحتمالات مفتوحة إلا ان اللي بشوفه دة يبقى في مصر

امال العواطلية اصحابي مجوش في الاعلان لية

و الاتوبيس العطلان اللي بركبه كل يوم مجاش لية

و الوسطة اللي بدور عليها عشان اشتغل و مش لقيها مجتش لية

قدام كل دة مجاش يبقى الاعلان دة مش في مصر

على راي عم نجم

"يبقى البتاع في البتاع و الناس تقول دة زهول"

"و ان حد قال دة البتاع يقلوله مش معقول "

و الله عم نجم مكدبش يلا يا جدع دي بلد بتاع صحيح ما علينا

اوصيكم خيرا بانفسكم و متشفوش الاعلان دة

اللي ماشي بالشقلوب يعني انت تسمعه في اوله صح تيجي عند نصه و تقلب ما تستناش

و احب اهدي لجميع اعضاء الحزب الوطني

اغنية

انا لا مسطول و لا بطوح

و يا عيني عليكي يا مصر

--------------------

شمس الزناتي

-----------------

قبح الحكومة في مواجهة البطالة والشباب الضائع

الحكومة المصرية بتاعتنا الجميلة اللي مش حارمة أي حد من أي حاجة أبداً
لقت عندها مشكلة بطالة كبيرة جداً جداً فوق الوصف والأعداد بالملايين
والغلابة كلهم من أصحاب المؤهلات العليا والشهادات المتقدمة
منهم اللي قاعد على القهوة
ومنهم اللي اتجه للمخدرات والإجرام
ومنهم اللي مات جواه أي حلم وأي أمل في بكرة
ومنهم اللي لسه جواه بصيص أمل وتفائل
وغيرهم كتير جداً بس مش عايز أخوض في حاجات كتير
المهم
الحكومة بتاعتنا بقى فكرت في حل للناس دي تشغلهم إزاي
أو بمعنى أصح
تقفل بقهم عن الكلام والوظائف والأشغال نهائياً
وتبقى عملت اللي عليها وزيادة شوية
ففكرت في فكرة شيطانية عبقرية
وبيها عملت عذر أقبح من ذنب
وممكن يكون فيه ناس كتير شافت الإعلان بتاع الفكرة دي
وهي إنك تتصل على رقم تليفون 16456
وتديهم كل بياناتك مهاراتك
وهما يردوا عليك في أسرع وقت بالشغل و الوظيفة الموجودة
وهيدلوك على المكان المناسب ليك
بس
عارفين يا جماعة الوظائف دي إيه ؟؟؟؟
الوظائف دي عبارة عن
عمال في مصانع
تشتغل على ماكينة أو تنقل شوية حاجات أو حتى شيال
وكمان عمال في المقاولات مع مهندسين
يعني بالبلدي كده تشتغل فواعلي بالأجرة
وتشيل رمل وزلط على كتافك
وممكن ربنا يكرمك وتقعد على ماكينة خلط الأسمنت
بس مش هتبقى مليونير ووزير زي سعد الدالي يعني

وكمان إيه اللي هيكون كويس في شغله وعلى مستوى عالي

هيسفروه بلاد برة يشتغل هناك

علشان تبقى مرمطة من كله غربة ... وفقر

وموت يا حمار بقى ... وأبقى قابلني لو عرفت ترجع تاني

ولا حتى تقدر تعيش بكرمتك وبعزتك هناك
وغيرها من الأمثلة دي كتير بس أنا مش فاكرها كلها
والنبي
أنا راضي ذمة أي حد في الدنيا دي
الكلام ده ينفع مين ؟؟؟
ولا حتى يرضي مين ؟؟؟
طبعاً وكالمعتاد
هيطلع واحد يقلك وإيه يعني هو مش شغل وخلاص
والتاني هيطلع يقولك ده أقرع ونزهي سيبك منه
والتالت هيطلع يقولك إنت عايز تشتغل وزير
والرابع بقى هيقول أي حاجة والسلام
بس اللي أنا عايز أقوله
إن الناس دي اللي هتخلي فكرة الحكومة الشيطانية تنجح نجاح ساحق
إنها تقول إننا عملنا اللي علينا من ناحية البطالة
ووفرنا ليهم وظائف وأشغال والناس اللي اتقدمت اشتغلت والحمد لله
وعملنا اللي علينا علينا والباقي على الله

بعد لما اتعلمنا وتعبنا و أهالينا سهرت وصرفت علينا دم قلبها
يبقى أخرتها إنك تلاقي نفسك في الوضع ده وفي المستوى ده
وغيرك بقى من أصحاب الوسائط والفلوس والمصالح
غارقنين في الوظائف والأشغال ولا في دماغهم أي حاجة ولا حتى أي مشاكل
وممكن يكون منهم كمان أقل منك ومني في علمك وتفكيرك وجهدك
يبقى الواحد كان خدها من قصيرها وبلاها تعليم وشهادات وزفت
وراح اتعلم أي صنعة أو أي بلة أزرق وعاش وخلاص
بس هتقول إيه بقى
هي دي بلدنا مصر وهي دي حكومتنا

معلش بقى يا جماعة أنا طولت عليكم
بس الموضوع ده حارق دمي أوي

تحياتي ليكم

NOSHA

المدونين في العيد

كنا قد وعدناكم انا و حبيبي و صديقي نوشة

ننقلكم اية اللي هيحصل في لقاء المدونين الجميل جداً ثالث يوم العيد

ابدء بقى احكيلكوا

و هرفعلكوا الصور قريب

المهم قبل ما احكي ان المدونة الرائعة

emy

انا قبلت التاج بتاعها على مصري للنهاية

و قبلت كمان دعوتها يوم الجمعة و هي عارفة انا بتكلم عن اية بس ربنا يسهل و نوضب مع بعض

احكيلكوا بقى

الاول اتقابلنا انا و نوشة الساعة الرابعة بعد ما غلبني كل شوية اصحيه من النوم

و اول ما شاف وشي قلي عايز اشرب قهوة

كأني قهوجي

و بعدين رحنا التحرير في إنتظار باقي المدونين

و واحدة واحدة

ظهر المدونين المنضبطين في موعيدهم و الغير منضبطين

أقلكم إزاي

أولاً:ــ حضرت المدونة الفكر السجين

و دقايق و حضرت كلمات تائهة

و وقفنا في الانتظار

قد إيه بقى كتيييييييييييييييييييييييييييييييير اوىىىىىىىىىىى

حتى حضر

انا بحبك يا مصر - الجيزاوي و معه ضياء و حسن

قلنا فرجت و هتبدأ تندع شوية و جة حبيب قلبي مارو بيفش غليله

و حين البأس - منذر حباصة

و بدأنا نقرر هنروح فين و طبعاً ترددنا كتير اوي خاصة بقى ان الشاعر

فضل يقلنا على الموبيل قدامي 10 دقايق

لمدة ساعة

المهم بعد اعتذار سكوت هنصوت عن الحضور

قررنا نروح البورصة و روحنا قعدنا هناك و كان معانا

تامر حنتكلم

و قعدنا نهرج و نضحك لحد ما الشاعر جه و قلك نتكلم بقى كلام ثقافي و حاجات كتير اقلكوا انا هسيب المايك مع نوشة يكمل و يحكي اكتر كان معكم

من القهوة

شمس الزناتي

--------------------------------------

والله وبصراحة كده إحنا من ساعة لما جه الشاعر والقعدة اتقلبت

من ضحك وهزار وفرفشة

إلى ساحة معركة كبيرة

والشاعر رأسه وألف سيف إننا نطلع بفكرة ومعلومة من القعدة

واللي جاي عليه إننا نعمل نقطة نظام

وعملنا نقطة النظام وتولى الجيزاوي و شمس الحوار

وعينكم ما تشوف إلا النور

دخلنا في نقاشات حادة مع بعض وحوارات ساخنة

وبالأخص من تامر والشاعر وبعدين دخل مارو في المشادة وكمان دخلت إيناس

وأنا بصراحة كنت ساعتها قافش الجيزاوي ونازلين ضحك وملناش دعوة بأي حاجة

بس بصراحة أنا اللي عملت كده لإن الجيزاوي كان عايز يسمع ويتناقش وأنا خليته ينفض

المهم بدأنا نخلص الكلام وراح الشاعر مدينا أغنية كلماتها جميلة جداً صحتني من النوم

وبدأت المشادة تقل واحدة واحدة

وأستأذن تامر ومشي وراح معاه منذر يوصله

وبدأنا تاني نهرج ونضحك من جديد

أستأذنوا البنات علشان يمشوا هما كمان أصل الوقت كان اتأخر عليهم

وصفصفت القعدة على

شمس ــ نوشه

الجيزاوي ــ منذر

مارو ــ الشاعر

ضياء ــ حسن

وقلنا بقى نقوم نروح ناكل واقترحنا إننا نروح مطعم آخر ساعة

ولما رحنا عند المطعم استأذن

ضياء وحسن

واشترينا بطاطس وديناميت وقعدنا على القهوة

كلنا وبعد كده جالي تليفون وأستأذنت أنا وشمس

بس بصراحة يا جماعة اليوم كان جميل جداً

وأجمل ما في اليوم إننا كنا صحبة جميلة متآلفين ومتجانسين مع بعض

من غير أي مشاكل أو خلافات أو أي مصالح

ربنا يدمها علينا يارب

كمل معاكم بقيت الحوار

NOSHA

................................................

كل سنة وأنتم طيبين

إخواتنا وأصدقائنا وأحبائنا المدونين

خلص شهر رمضان بكل ما فيه من توبة ومغفرة ودعاء

يارب يتقبل منا كلنا دعائنا ومن الأمة الإسلامية كلها

وجينا بقى للعيد

وجانا العيد أهو جانا العيد

والعيد فرحة لكل الناس

وبالمناسبة دي بقى

نهدي تحياتنا إلى كل إخواتنا وأصدقائنا وأحبائنا المدونين

وعلى الأخص

مارو

منذر ــ حين البأس

حمادة زيدان

محمد جمعة NO FEAR

محمد مفيد

ابن ناصر

الحسيني ــ صاحب البوابة

أخونا كلنا الصغير ــ هشام رمضان

وحبيبنا أحمد الجيزاوي

ونقول له ألف حمد الله على السلامة ولو إنها جاية متأخرة شوية

وربنا يتقبل منك يارب وتكون دعيت لينا كلنا من قلبك

وإخواتنا البنات بجد فعلاً علشان أحنا مالناش إخوات بنات

العزيزة الغالية ــ أوشا ــ في القلب

الغائبة الحاضرة ــ منى المحمودي ــ وحدانية

الأخت العزيزة ــ بطة ــ بنت الإسلام

الأخت المشاكسة ــ إيناس ــ الفكر السجين

إحنا بصراحة مش عايزين ننسى حد ولو نسينا حد معلش بقى

نوعده إننا نصلح الغلط ده في أسرع وقت

المهم والمضمون

إننا بنقول لكل المدونين في كل أنحاء الوطن العربي كله

وخاصة المدونين المصريين

وللأمة الإسلامية كلها

كل سنة وأنتم طيبين

وعيد سعيد علينا وعليكم إن شاء الله

NOSHA

شمس الزناتي

إلا رسولنا الكريم

السلام عليكم لكل أصدقائي وأحبائي المدونين

معلش يا جماعة أنا مقصر في كتاباتي ومتابعاتي في رمضان

ولكن انهاردة بقى كان لازم ألبي دعوة صديقي وأخويا شمس

لنصرة رسولنا

سيدنا محمد صلى الله عليه وسلم

خاتم الأنبياء والمرسلين

و أشرف الخلق آجمعين

وخصوصاً كمان إن انهاردة ليلة القدر

الليلة الخير من ألف شهر

اللهم تقبل منا جميعاً دعواتنا وصلاتنا في هذه الليلة الكريمة

فكان لابد من الخروج عن صمتي

لنصرة رسولنا الكريم ونصرة الإسلام

رسولنا الصادق الأمين

نبينا محمد صلى الله عليه وسلم

نبينا الأمي اليتيم الذي إختاره الله سبحانه وتعالى من دون سائر البشر ليكون

هدياً للبشرية كلها

وليوحد الناس على دين الحق الإسلام

فهو الصادق الأمين حبيب الله

وهو العادل في حكمه

وهو المنتصر على أعدائه أعداء الدين

وهو الوفي بالعهد مع كل من عهد له

وهو غافر المسلمين جميعاً يوم الحساب

وهو الذي صلى بالأنبياء جميعاً وحده دون غيره

إنه رسولنا رسول الله صلى الله عليه وسلم

فلازم يا جماعة إننا نجتمع على كلمة واحدة وقلب واحد

لنصرة ديننا ورسولنا الكريم ضد أي شخص على وجه هذا الكون

مهما كان هو مين أو سلطته إيه

وده مش هيتم إلا لما كلنا نكون ماشيين بكتاب الله وسنة رسوله الكريم

فالعزة لله ولرسوله الكريم ولنا نحن المؤمنين بإذن الله

طبعاً أنا لو قعدت أتكب وأتكلم يبقى هاخد سنين كتير علشان أوفي لنبينا محمد صلى الله عليه وسلم حقه

ولكن دي البداية بس والكلام جاي كتير

ودفاعنا عن رسول الله مستمر مهما طال الزمن

تحياتي ليكم جميعاً إخواتي وأصدقائي المدونين

وكل سنة وأنت طيبين وبألف خير

NOSHA

هو فية اية .....كابوس

هو فية اية...... استنوا بس...... يا عم انت و هو

اه........ يا كابتن مين دول

خلاص انا همشي معاكوا لوحدي

طب انتوا وخدني على فين ............بالزوق طيب

طب احنا هنا فين

استنا بس يا عم............ المبني دة بتاع اية

طب انا مبحبش الاماكن المظلمة ..............يا استاذ يا استاذ

هو : اهلا يا عم الوطني

شمس : ممكن اعرف انا هنا لية و سيادتك مين

هو : انت هنا لية? انت اللي هتقول ............سيادتي مين?........... انا اللي هسألك و انت اللي هتجاوبني

شمس : طب و اية لزمة الكلام دة كله يا بية و شد و جذب و نزلتوني من البيت مبهدل طب ما تقولولي و انا اجي لوحدي

هو : و اديك جيت

شمس : طلباتك يا باشا

هو : اللي عندك قوله انت تبع مين و بتشتغل لحساب مين

شمس : نعم

هو : تبع مين و بتشتغل لحساب انهى منظمة

شمس : منظمة مين..... فين..... اللي هو اية ..... يعني لية

(طاخ )

( ااّه )

شمس : اية يا باشا احنا فينا من كدة هي البهوات دول كمان بيضربوا انا فاكرهم واقفين بس طب اية طلباتك يا بية

هو : مين اللي مشغلك يا روح امك

شمس : هو انا لو لقيت حد يشغلني كنت بقيت عاطل

طاخ طاااااااااااخ اااااااااااااااّه اااااااااااااااّه

استنى بس هقلك بس اااااااّه اااااااااااااّه

يا عم اااااااااااااّه

قفايا مش قادر

يا بية انا هتكلم

هو : عايز تقول حاجة يا شمس

شمس : شوف سيادتكم اللي عايزني اقوله و اكتبه و انا امضي من سكات

هو : ايوة كدة اكتب يا بني و قد اعترف المتهم بجميع جرائمه و تخطيطة للانقلاب على ...........و تكوين ......... و عمل

شمس : و النبي يا بية استنى لحظة مين بن الكلب اللي اعترف بالكلام دة

هو : انت يا شمس

شمس : بس انا مش كدة دة انا مش مطلع عيني غير حبي للبلد دي

هو : هتغلبنا تاني يا شمس

طاخ طاااااااااااخ اااااااااااااااّه اااااااااااااااّه

طاخ طاااااااااااخ اااااااااااااااّه اااااااااااااااّه

طاخ طاااااااااااخ اااااااااااااااّه اااااااااااااااّه

طاخ طاااااااااااخ اااااااااااااااّه اااااااااااااااّه

طاخ طاااااااااااخ اااااااااااااااّه اااااااااااااااّه

اااااااااااااااّه اااااااااااااااّه اااااااااااااااّه اااااااااااااااّه

اااااااااااااااّه اااااااااااااااّه اااااااااااااااّه اااااااااااااااّه

ماما : يا شمس يا شمس مش هتصحى يا حبيبي عشان تنزل مشوارك

شمس : قفايا سيبوني

ماما : يا شمس قوم في اية مالك

شمس : اه كابوس فظيع اوي يا ماما حلمت كاني و لا اقلك انا اكتبه بوست و ابقى اقرية.............. على فكرة انا مش معاهم

القصيدة دي عملالي مشكلة

بجد يا جماعة القصيدة دي عملالي مشكلة من ساعت اول مرة قريتها

و عملالي مشكلة اهديها لمين

انتوا عارفين اني بحب الشعر جدا و بكتبه

و دي

قصيدة لفاروق جويدة " عيناك ارض لا تخون " بتقول

اية بقى

شعر / فاروق جويدة ( شاعر مصري )
ومضيتُ أبحثُ عن عيونِكِ خلفَ قضبان الحياهْ

وتعربدُ الأحزان في صدري ضياعاً لستُ أعرفُ منتهاه

وتذوبُ في ليل العواصفِ مهجتي ويظل ما عندي سجيناً في الشفاه

والأرضُ تخنقُ صوتَ أقدامي

فيصرخُ جُرحُها تحت الرمالْ

وجدائل الأحلام تزحف خلف موج الليل بحاراً تصارعه الجبال

والشوق لؤلؤةٌ تعانق صمتَ أيامي ويسقط ضوؤها خلف الظلالْ

عيناك بحر النورِ يحملني إلى زمنٍ نقي القلبِ .. مجنون الخيال

عيناك إبحارٌ وعودةُ غائبٍ

عيناك توبةُ عابدٍ وقفتْ تصارعُ وحدها شبح الضلال

مازال في قلبي سؤالْ

.. كيف انتهتْ أحلامنا ؟

مازلتُ أبحثُ عن عيونك علَّني ألقاك فيها بالجواب

مازلتُ رغم اليأسِ أعرفها وتعرفني ونحمل في جوانحنا عتابْ

لو خانت الدنيا وخان الناسُ وابتعد الصحابْ

عيناك أرضٌ لا تخونْ

عيناك إيمانٌ وشكٌ حائرٌ عيناك نهر من جنونْ

عيناك أزمانٌ ومرٌ ليسَ مثل الناسِ شيئاً من سرابْ

عيناك آلهةٌ وعشاقٌ وصبرٌ واغتراب

عيناك بيتي عندما ضاقت بنا الدنيا وضاق بنا العذاب

*** ما زلتُ أبحثُ عن عيونك بيننا أملٌ وليدْ

أنا شاطئٌ ألقتْ عليه جراحها أنا زورقُ الحلم البعيدْ

أنا ليلةٌ حار الزمانُ بسحرها عمرُ الحياة يقاسُ بالزمن السعيدْ

ولتسألي عينيك أين بريقها ؟ ستقول في ألمٍ توارى صار شيئاً من جليدْ

.. وأظلُ أبحثُ عن عيونك خلف قضبان الحياهْ

ويظل في قلبي سؤالٌ حائرٌ إن ثار في غضبٍ تحاصرهُ الشفاهْ

كيف انتهت أحلامنا ؟

قد تخنق الأقدار يوماً حبنا

وتفرق الأيام قهراً شملنا

أو تعزف الأحزان لحناً من بقايا ... جرحنا

ويمر عامٌ .. ربما عامان أزمان تسدُ طريقنا

ويظل في عينيك موطننا القديمْ

نلقي عليه متاعب الأسفار في زمنٍ عقيمْ

عيناك موطننا القديم وإن غدت أيامنا ليلاً يطاردُ في ضياءْ

سيظل في عينيك شيءٌ من رجاءْ

أن يرجع الإنسانٌ إنساناً

يُغطي العُرى يغسل نفسه يوماً ويرجع للنقاءْ

عيناك موطننا القديمُ وإن غدونا كالضياعِ بلا وطن

فيها عشقت العمر أحزاناً وأفراحاً ضياعاً أو سكنْ

عيناك في شعري خلودٌ يعبرُ الآفاقَ

... يعصفُ بالزمنْ

عيناك عندي بالزمانِ وقد غدوتُ

..

بلا زمنْ

----------

القصيدة دي من يوم ما قريتها من خمس سنين و حلفت اهديها لحد

اول من خاطر ببالي اغلى انسانه في الدنيا امي

و بعدين القصيدة احلوت في عيني قلت دي قيمة جدا اهديها

لوالدي و والدتي معا

" طبعا معنى ان اهيدها لراجل يعني لهجه المخاطبة هتتغير.......بس مش مشكلة "

و بعدين لقيت معانيها كبيرة

فكرت كمان اهديها لحبيبتي

و بعدين لقيت اني عايز اهديها لاخويا و اختي

و صديقي و صدقتي اللي بحبهم و مفهموش الحب دة قد اية

و بعد ما عرفت ازاي اكون اجتماعي في النت

قلت اهديها للجروب اللي انا فية

و بعدين قلت اهديها للمدونين و المدونات و تبقى اهداء

و في الاخر حسيت اني ههديها لكل مسلم و لكل مصري

و دي المشكلة مش عارف اهديها لمين

الأمة الإسلامية في خطر كبير

إلى كل مسلم في جميع أنحاء مصر وخارجها

إلى كل المحافظين على الدين الإسلامي والقرآن

إلى كل فرد يغار على ديننا الإسلام وعلى القرآن الكريم

ظهر كلام بيقول إذا كان لديك القرءان على المحمول فأنظر إلى الآية رقم 90 من سورة النساء

على أي برامج القرآن الكريم الخاصة بالمحمول أنه يوجد بها تحريف حيث أن

كلمة يقاتلوكم استبدلت بكلمة يقاتلونكم

ومش كده وبس وإنما فيه كلام تاني محرف ولكن أنا بصراحة معرفش عنه معلومات كافية للإدلاء بها

والكلام ده طبعاً فيه مساس بالقرآن الكريم وبالدين الإسلامي

لأن الكلام ده لو موجود فعلاً فيعتبر تحريف صحيح وواضح للقرآن الكريم

فعلشان كده أرجو إن كل واحد يتأكد من الموضوع ده كويس جداً

ومش كده وبس

إنما يتأكد من المصحف كامل من البداية للنهاية

وأرجو إن أي حد يقدر يوصل إذا كان الكلام ده صح ولا غلط

أنه يبلغ الناس كلها عن النتيجة

وكلامي ده كله للتحذير والتنيه بس

علشان لازم كلنا نغار على ديننا الإسلام وعلى القرآن الكريم

وده كله علشان نحفظ القرآن الكريم وهو كتاب الله عز وجل من التحريف

فأرجوا من الجميع بلا استثناء أنه يراجع كل برامج القرآن الكريم على التليفونات المحمولة

ومراجعتها مع المصحف علشان لا قدر الله لو الكلام ده صح

يبقى لازم نتخلص من كل البرامج دي نهائياً إن احتوت على هذا التحريف

وربنا سبحانه وتعالى قادر على حفظ القرآن الكريم وهو كتابه عز وجل

ملحوظة :ـ ياريت يا جماعة لو أي حد توصل لصحة المعلومة دي أو كذبها إنه يخبر جميع الناس بها

NOSHA

أنا مخنوق

أنا مخنوق

ــــــــــــ

طبعاً أي حد هيرد عليا ويقولي ليه

مالك .... خير فيه إيه ؟؟؟؟

حرد على أي حد وأقوله

والله العظيم أنا مش عارف مالي فيه إيه

أو حتى مخنوق من إيه

مرة واحدة كده وبدون سابق إنذار

لقيت نفسي مخنوق وقرفان من كل حاجة

لأكبر الأسباب أو حتى أتفه الأسباب

وبدأت كمان من خنقتي

أني أخنق اللي حواليا

وبرده لأكبر الأسباب أو لأتفه الأسباب

حاجات كتير أوي أصبحت بتضايقني

حتى من سماع سيرتها أو إسمها

أو حتى كمان وصفها

وأفعال بقت غريبة عليا وبقيت بكرهها

ولو أني كنت بعملها قبل كده

لحظات بتيجي عليا ببقى فرحان ومبسوط

وطاير بالدنيا كلها

ولحظات تانية بتيجي عليا ببقى حزين ومكبوت

والدنيا كلها غلط حواليا

مبقتش عارف فيه إيه ؟؟؟
ولا حتى أعمل إيه ؟؟؟؟

ويا ترى هل أنا صح ولا أنا غلط ؟؟؟

برده مش عارف

بس اللي خلاص عرفته وقررته

أني لازم أنزعل وأبقى لوحدي شوية

بعيد عن كل الناس القريب منهم والبعيد

علشان أقدر أجمع دماغي وأفكاري من جديد

وأعرف ........وبعد كده أقرر

أنا صح ولا غلط

وفي الوقت ده طبعاًمش قادر أقرر

أو بمعنى أصح مش عارف أقرر

هل أنا صح ولا غلط ؟؟؟

وهل دي مرحلة عادية بسبب تغييري

ولا أنا بقى خلاص محتاج دكتور نفسي

أتمنى أني أعرف هل ده شيء طبيعي ولا إيه ؟؟؟

ـــــــــــــــــــــــــــــــــــــ

NOSHA

ــــــــ

المال و البنون

المسلسل دة يا جماعة بيعجبني جدا

و اللي خلاه يعجبني اكتر ان الواد اسامة و الواد تامر

اصحابي الانتيخ بيقولولي سعات كتير يا يوسف يا وريث

هقلكوا على مشهد بيعجبني اوي في المسلسل دة

لما عم عباس الضو قال ليوسف : يا بني دة ما سرقش الخواجة دة سرق البلد بحالها سرق مصر سرق قوت الغلابة و سرق اثار مصر

جملة جامدة اوي كان عايز يبين فيها قد اية المصيبة اللي عملها الحج سلامة

عشان يرد علية يوسف ان انت لما اتسترت علية كانت مصيبتك اكبر

و يقوله : ما انت شاركته و اديتوا نصيبك خد هو المال و خدت انت الذنب يا عم عباس

يعني بدل ما عندنا مصيبة مهرب لا و مصيبة متستر علية

تحت اي اسم صداقة اخوة زمالة برضة مفيش مبرر

بس اللي بجد بيضايقني في المسلسل ان الحكومة ما رجعتش الاثار دي

و انا كان نفسي اشوف الاثار دي شكلها اية

على العموم الحكومة في الموضوع دة معزورة

خارجة من ناكسة و شايلة الطين

و الله معزورة

بس الحمد لله احنا دلوقتي عارفين ان معندناش الا شوية نكسات داخلية

عشان كدة بقى لو الحاج سلامة ظهر تاني سنة 2007

الحكومة هتعرف تجيب منه الاثار على طول

هي الحكومة ترضى اثار بلدنا تتهرب برة

لا طبعا ما ترضاش

مش كدة و لا اية؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟

طب انت رايك من رايي و لا اية؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟

انت معاهم و لا اية ؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟

انا معاك

مش معاهم

---------------

شمس الزناتي

--------------

مرحلة جديدة من عمري

فيه تغيير في حياتي وسلوكياتي بقالي فترة كبيرة

وبصراحة وبدون كذب ولا إحراج

أنا أول مرة أحس بالتغيير باللي بيحصلي

بس اللي أنا عارفه كويس جداً

أن أنا في مرحلة تغيير جزئي لشخصيتي ولحياتي ولطباعي ولكل كياني

ويمكن كمان يكون تغيير كلي مش جزئي

الحكاية بدأت لما بدأ تفكيري يتغير

وأهدافي وطموحاتي كمان بدأت تتغير

للأحسن وللأفضل طبعاً

حاجات كنت بحبها وبحب أعملها من فترة بسيطة

أصبحت دلوقتي بالنسبة ليا مجرد شيء عادي

وحاجات كانت مش على دماغي وقليل أوي لما أعملها

أصبحت دلوقتي هي جزء كبير من دماغي

حتى طموحاتي وأهدافي كمان بدأت تتغير

حتى أفكاري ومشاعري تجاه أي شيء بدأت هي كمان تتغير

بدأت أحلم أحلام جديدة والأحلام اللي كنت بحلم بيها قبل كده

بقى ليها وجهة نظر تانية وكمان حسابات تانية

بالاختصار المفيد حياتي وكل كياني في تغيير

جايز فيه ناس قريبين مني حاسين بكده

وهما معايا كمان إن فيه تغيير لكل كياني للأحسن والأفضل

وبيشجعوني كمان أني أكون في أحسن وأفضل حال

وفيه ناس تانية بقى مش قادرين يفهموا أي حاجة مني

لدرجة إنهم معارضيني ورافضين التغيير ليا رفض نهائي

مش كده وبس

كمان عايزني أكون بنفس كياني اللي فات

ده حال القريبين مني

رغم أني عارف ومتأكد جداً إني

هخسر ناس كتيرة بسبب تغييري ده

ولكني متأكد وواثق جداً أني

هكسب ناس أكتر من اللي أنا هخسرها بسبب تغييري ده

أما البعيد عني بقى

فنفسي أنه يحس بيا ويشوف أنا وصلت لفين

وبعمل إيه كمان علشان أوصله ويكون معايا

بس ............ يا ترى هو حاسس إني بفكر فيه

يا ترى هو حاسس أني بتمناه

يا ترى هو حاسس أني نفسي يكون من نصيبي

ويفضل معايا لآخر عمري

أممممممممممممممممممممممممممممممممممم

أنا مش هقدر أرد على السؤال ده دلوقتي

لأني بصراحة شديدة مش عارف شعوره من ناحيتي إيه ولا بيفكر فيا كمان ولا لا ؟؟

المهم أرجع تاني لموضوعي

أني والحمد لله بدأت مرحلة جديدة من مراحل عمري

مرحلة بتغير كل حاجة فيا وبتغير كل كياني

وأتمنى من ربنا سبحانه وتعالى أنه يكون فعلاً تغيير للأحسن وللأفضل

ويكون فيه خير ليا ولكل اللي حواليا

وبإذن الله هيكون في خير كتير ليا

أما اللي حواليا بقى ؟؟؟ بصراحة مش عارف أقول إيه عليهم

لأن أنا مش معاهم

NOSHA

و الله مش معاهم

كل الموضوع ان نوشة رزع بوست لية هو مش معاهم

و شرح وجهه نظرة فقلت انا كمان اشرح وجهه نظري

و بالطريقة اللي بنحبها كلنا واحدة واحدة

انا عشان اعيش يبقى ايجابي يبقى سلبي

بقيت سلبى ضمنا حيتان البلد يدسونا بقيت ايجابي

يبقى احنا قدام حل من اتنين

يبقى تبع الحكومة يبقى تبع المعارضة

بقيت تبع الحكومة خير و بركة

بقيت تبع المعارضة

يبقى احنا قدام حل من اتنين

يا تبقى تبع حركة يا تبع حزب

لو تبع حركة يبقى معتقل وش و اضعف الايام علقة من الامن المركزي كل شهر

طب لو تبع حزب

اه يبقى احنا قدام حل من اتنين الحزب دة يا اما محظور يا اما مش محظور

لو محظور يبقى انا كل تحركاتي مرصودة بكاميرا اصلية عند الجهات المعنية

يعني ابقى مسيس يعني انافق نفسي و انافقكوا

طب لو حزب محظور

يبقى احنا قدام حل من اتنين

يا اما تعجبك مبادئه يا اما لا

عجبتك مبادئه خير و بركة

يبقى سعادتك من الناس اللي عمري ما بتفق معاهم و اللي قلت عنهم انهم تاريخهم غلط ( مع الاعتذار ) اسف يعني

نرجع بقى و نقول يا اما المبادئ دي معجبتكش

يبقى انت كدة شاب اصلي و زيي بالظبط

بس احنا كدة يبقى قدامنا حل من اتنين

يا نقعد ايدنا علي خدينا و نتقهر و نموت بالسكته

يا نعمل اضعف الايمان و ندون

مت يبقى الله يرحمك و يرحمني معاك قول امين

عملت اضعف الايمان

يبقى لازم تحط اسم للمدونة

و من الاسم دة تقول انت اية مبدئك

و عشيت اوصف مبدئي في كلمتين

لازم اقول انا اتبع البرنامج الفلاني

و لاني لا اتبع اي برنامج قلت

اجيب من الاخر و اقول

انا مش معاهم


---------------
شمس الزناتي
--------------

جاءنا البيان التالي

بسم الله الرحمن الرحيم

جائنا البيان التالي " قرر رؤساء و ملوك و سلاطين و امراء الدول العربية عقد قمة طارئة بالقاهرة في غصون اسبوع من اذاعة البيان لمناقشة و تقرير توحيد جميع الدول العربية كدولة واحدة تحت اسم واحد و علم واحد و من ثم مناقشة ما يترتب علية من

توحيد الجيوش العربية و عمل عمله موحدة و عمل برنامج انتخابي عادل على مستوى القطر العربي لاختيار الحاكم

و قد ذكر اغلب الحكام العرب بعد نشر البيان على ان من اهم الدول التي ستنضم و تكون دلايات داخل الدولة العربية الواحدة هي العراق و سوريا و فلسطين و الاردن و مصر و السعودية مع باقي الدول العربية "

انتهى البيان

تفتكروا ممكن في يوم في شهر في سنه نسمع البيان دة

ساعتها

انا هبقى معاهم

-------------------

شمس الزناتي

----------------