أخبار انا مش معاهم : نوشة وشمس يهنئون كل الشعب المصري والمدونين خاصة بقرب حلول عيد الفطر المبارك ويارب يكون العيد كله فرحة وسعادة للناس كلها

Friday, September 5, 2008

خالد الصاوي احنا معاك

لاول مرة من مدونة انا مش معاهم نقول لحد احنا معاك
بكل بساطة و اختصار و من غير ما احكي و اقول الانسانية و النداء الانساني
انا هختصر عشان الحوار لا يتطلب عطله
خالد الصاوي
الدولة مصر
العمر 43
مدرس لغة عربية و مدون زميل
دة لنك مدونته
http://badd.jeeran.com/profile/
لا هتكلم على افكاره و لا على انه مدون زميل و لا على انه مصري هي كلمه واحدة
اقل واجب مننا لخالد الصاوي هو ان احنا نسأل علية و نرفع من روحه المعنوية
و نقله كن كما عودتنا اقوي حتى من الالم
دة رقم الرجل الاردني الانسان الشهم الملازم لية 0192758429
وهذا هو رقم الحساب الخاص به لمن يحب ان يتبرع ولو بأقل القليل
رقم حساب 42423/501/620 بنك القاهرة فرع بني سويف خالد محمد محمد حسين
و كفاية علية كدة عشان نوشة و لاول مرة هو اللي كان عايز يبدا البوست من لهفته
انا بشكر جدا الاستاذ
عادل نجم ، و اختنا الغالية بطة بكر عن تنويهم و ياريت كلنا نكون زيهم

Sunday, June 8, 2008

انت مين في دول ؟؟؟؟

إنت منهم ؟؟؟؟ .....أيوة القارئ اللي بيقرا البوست ده منهم .....إنت منهم
انا عارف انتوا مش عارفين إيه الحكاية
احكلكوا الحكاية في الشات اللي دار بيني و بين نوشة
شمس : فينك يا نوشة
نوشة : موجود على الماسنجر
شمس : هههههههههه بطل كوميديا بقى ،،، مش بتكتب ليه
نوشة : عشان أنا مش معاهم
شمس : أنا كمان مش معاهم
نوشة : يبقى عايزني اكتب ليه
شمس : عشان نقول
نوشة : مش كل حاجة بتتقال
شمس : طب تيجي نقول و نقول
نوشة : ما بلاش
شمس : هنقول
نوشة : طب و الله هنقول و بجد هنتكلم
بصراحة يا جماعة شمس و نوشة قابلوا مدونين كتير و اتعرفوا عليهم و حبوهم جداً و عرفوهم و هيحكوا عنهم كل بوست هنكتب عن مدون عليكوا إنكم تعرفوه و تقولوا هو مين و البوست اللي بعده هنعلن عن اسمه و هنقول مين اللي عرفه هنكتب عن مدونين اثروا فينا عرفناهم و حبناهم شفنا فيهم حاجات كتير
هتستنونا عشان جايز يكون أي قارئ منكم فيهم انتوا اللي هتقولوا
نوشة :ـــ وأنا واثق إنكم هتستنوا لإن الموضوع مش بس كلام لكن أكتر من كده بكتير
الموضوع إننا هنتكلم عن كل الناس اللي عرفناهم وعرفونا ومش كده وبس ...... لا ......كمان
هنتكلم بكل صراحة وبلا خجل أو زعل
بس يا ترى هنتكلم عن مين بالظبط
ولا هنقول إيه ؟؟؟؟؟؟؟
مستنيين رأيكم علشان تقولوا لينا إنت مين في دول ؟؟؟
تحياتنا لكل أصدقائنا وحبابينا
بس على فكرة ولا أنا ولا شمس هنقول هو ولا هي مين
عارفين ليه ؟؟؟؟؟
لإن كل واحد فينا أنا وشمس هيقول حاجة واحدة بس
أنا مش معاهم

>


نوشة ---------------------شمس الزناتي

Saturday, May 3, 2008

كل سنة و انت طيب يا ريس

بسم الله الرحمن الرحيم
و ادع الي سبيل ربك بالحكمة والموعظة الحسنة
صدق الله العظيم
وحشني جدا اني اكتب في مدونة " انا مش معاهم " خاصة انها المدونة الخاصة بي انا و صديقى نوشة طبعا انا مش جاي النهاردة عشان احكيلكوا عني انا و صديقي لكن انا بكتب النهاردة لسبب اخر و هو ان غدا بأذن الله هيكون 4 /5/2008 اي الرابع من مايو
و طبعا دة بيفكرنا بحدث مهم ، حد هيقلي الاضراب اقله لا يا فندم و انما عيد ميلاد الرئيس محمد حسني مبارك
و انا من مكاني هذا من خلف الكي بورد احب اقله كل سنة يا ريس
و قبل ما حد يقول ان انا قلبت منافق احب اقلهم تعالوا نفتح عنينا
مبدئيا منذ ايام قليلة خرج علينا سيادة الرئيس بزيادة في المرتبات 30% و سواء اقر الزيادة تحت ضغط شعبي او ان احنا صعبنا علية فقال يحسن علينا فهو تصرف اعجبني و بما انني من افراد هذا الشعب فمن حقي ان اقدم شكري على هذا التصرف
ثانيا غدا يكون الريس اتم العقد الثمانين من عمره يعني 80 عاما في خدمه هذا البلد لو اعتبرنا ان من الثمانين سنه دول قام الرئيس بخدمه البلد على حق يقال قيمة 10 سنوات و هي سنوات الحرب و ما بعدها يبقى من حق اي مصري على خدمه العشر سنوات دول ان يعتبره من ابطال حرب اكتوبر و يقدم له التهنئة
اظن كدة انا نفيت عن قلمي صفه النفاق اللي كان ممكن ناس كتير تتهمنا بيها
نأتي بقى للنقطة الاهم
ما الشئ المتوقع حدوثه يوم 4 مايو
طبعا كلكوا عارفين اضراب 4مايو الشهير اللي الناس كلها بتدعوله على الفيس بوك
مبدئيا و باعلى صوت
انا مش معاهم
و هذا لاسباب مبدئيا حضراتكوا عرفتوا ما حدث في المحلة الاضراب الماضي و كان شئ لا يليق باي شعب متحضر
ثانيا : انا كنت اساسا ضد الاضراب الماضي يبقى من الطبيعي ان انا ضد هذا الاضراب ايضا
ثالثا و الاخيرة : ان الاخوان قرروا المشاركة في اضراب 4 مايو و دة سبب وجية يجعلني لا اشارك في هذا الاضراب
و في كمان ملحوظة مهمه مش انا لوحدي اللي قررت عدم المشاركة كتير معايا قالوها منهم
يعني متهيئلي ان دعاه الاضراب يفكروا من تاني و يفكروا صح قبل ما يعملوا اي حاجة
و متهيئلي كمان انا كاتب اية كريمة فوق بادئ بيها البوست ياريت نراجعها تاني مع بعض
و بقولها تاني للريس
كل عام و انت بخير

Friday, March 7, 2008

يلا نساعد في حماية إخواتنا وشباب بلادنا






إنهاردة يا جماعة جايين نتكلم عن حملة الأستاذ العزيز / عمرو خالد


والحملة دي تخص مدمني المخدرات وكيفية الحد منها عن طريق التوعية والنصح والإرشاد


وياريت يا جماعة إننا نشارك بقوة في الحملة دي لإنها تهم كل فرد فينا


من أطفالنا وحتى شيوخنا وعواجيزنا


وممكن لا قدر الله تحصل لأي شخص قريب أو صديق أو حتى من باب المعرفة


ومحتاجين مجهود كل فرد وخصوصاً شباب مصر للمساعدة


لإن نسبة المدمنين في مصر من الشباب والبنات بلغت ال خمسة ملايين شاب وفتاة


ونأمل من الله سبحانه وتعالى أن يعيننا على المساعدة وعلى الخير إن شاء الله


ومحتاجين كلنا يا جماعة إننا نعلق صورة الحملة وإننا نقوم بتحميل ملف الحملة


والحاجات دي موجودة على موقع الأستاذ / عمرو خالد





وياريت كل واحد فينا يشوف هو يقدر يعمل إيه وينفذه من غير تردد


وجزاكم الله وجزانا كل خير

Friday, February 15, 2008

لما نقرب أوي من بعض

الكليب ده يا جماعة آخر إبداعات شمس الزناتي فبل أجازته المفتوحة

وأنا كنت مشارك معاه في الكليب وأخدنا مجهود كبير جداً في عمله

وده إهداء مننا لكل أصدقائنا المدونين إلى جانب كل شاب مصري

وأسيبكم مع الكليب ويارب يعجبكم ومستني ردودكم وتعليقاتكم الجميلة

لما نقرب أوي من بعض

NOSHA

ـــــــــــــــــــــــــــــــــــــــــــــــــــــــ

Monday, February 11, 2008

حب كل اللي حواليك بصوت عالي

الموضوع ده يا جماعة لقيته و عجبني جداً فحبيت إني أنقله ليكم
وعلى فكرة ده من على الفيس بوك مش مواقع ولا منتديات
علشان ملاقيش أي حد بيقوللي الكلام ده كلامي ولا الموضوع ده بتاعي
وأسيبكم بقى مع الموضوع
قبل ما تقرا الموضوع ده
ياريت
ياريت
ياريت
تحط في بالك إنسان
غـــالــــي عليك وبتحبه أوي
وتركز تفكيرك على الإنسان الغالي ده ..
بعدها تبدأ تقرا
عايزك تكون بروحك
و انت بتقرا الموضوع ده
واهم حاجة عايزك تقف مع نفسك وقفه صراحه
عايزك بكل أحاسيسك
اليوم انت معاه..
أرضك أرضه
وهواك هواه
اليوم هو منك قريب
تقوم انت تسألني
أنا أقصد مين؟؟
اقصد....
حبيبك
حتى لو ما بتشوفهوش و على الأقل بتوصلك أخباره
بعد النهاردة ... تخيل لو مرة بس ... انه ...
رحــــل ....
فجأة وبدون سابق إنذار ...
اختفى من الدنيا
ابتعد ...
وراح لبعيد ...
بعيـــــــــــــــــــــــد ...
و مستحيل يرجعلك..
راح لمكان مفيش منه رجوووع ...
بتتخيل معايا صح ... ؟؟؟
راح لمكان الكل هيروح له ...
خلاااااص ...
رحل غصب عنك..
و أخده المووووووووووووووت ...
وخلاااك ...
إنت دلوقتي وحيد ..
تايه ..
حاير ..
متألم ..
مصدوم ..
تقدر تتخيل في اليوم ده
حالك حايكون عامل إزاي؟
بتصرخ؟؟
بتصيح ؟؟؟
و إلا من الصدمه بتسكت وقلبك من داخلك جريح .. ؟؟؟
حياتك بتمضي أكيد ....
بس !!! من دونه ...
إيامك بتعيشها صح ...
لكـــــــــــــــــــــن ...
بدون صوته ومن دون ما تشوف عيونه ....
تخيل إيه اللي ممكن تفقده ؟؟
صوته
حبه
حنانه
ابتسامته
عطفه
شوقه
ملامه
طيبته
حزنه
قسوته
عناده
غباؤه
براءته
هزاره
مفاجآته
قلـــبه
كــــــــــــــله ... ؟؟
تخيل إيه اللي ممكن تخسره ؟
حلمك
شمسك
بدرك
ليلك
عمرك
قلبك
كلك .. ؟؟
يا ترى بتلوم نفسك
لانك في يوم قسيت عليه؟؟
يمكن جرحته ولا راضيته ؟ أو
أو حتى يمكن في يوم نسيته؟؟
بس ما يفيد ندمك اليوم ...
هو خلاص راح الى حيث لا رجوع
وخلاك تتحسر على كل كلمة ضايقته
هو حبه ليك ما كنش شويه؟؟
كتيييييييييييييييييييييييييييييييييييير هو حبك
وانت قسيت عليه ...
اليوم حسيت بحبه .. وعايزه النهارده جنبك ..
و عايز تعوضه عن كل حاجة
بس تلقى نفسك عاجز .. وندمان
كل اللي قولناه ده مجرد تخيل
الفرصة قدامك و
هو جنبك اليوووم ...
حــــاول تحبه كل يوم..
حب كل إنسان غالي على قلبك..
يمكن ما تشوفه بعد اليوم..
قوله .. بحبك ....
ولا تنسى انه لسه بيحبك وبيمووت فيك ...
قول بحبك
لكل إنسان غالي عليك
صديقك
أو
صديقتك
زوجك
أو
زوجتك
أو
حبيبك
روح قوله انك بتحبه و ما تخبيش عليه
لأنه النهاردة معاك لكن بكرة ؟؟؟؟؟؟؟؟؟؟
يمكن ما يجيش عليه بكره

ياريت يكون الموضوع عجبكم مع تحياتي ليكم جميعاً

NOSHA

ـــــــــــــــــــــــــــــــــــــــ

Sunday, January 27, 2008

مظاهرة التحرير للتضامن مع غزة من داخل المظاهرة .... و معانا ربنا

في يوم أغبر مطلع ليه شمس ولا حتى نوشة
لقيت واحد بيكلمني في التليفون وبيصحيني من أحلى نومة
وبيقولي قوم يلا علشان نروح نصور المظاهرة بتاعة التحرير
وأنا كالعادة قلتله يا عم الحج أنا مش بتاع مظاهرات والكلام ده
قاللي إحنا ملناش دعوة بالمظاهرة ... إحنا هنصور بس
قلتله وماله يا عم الحج ... وبالمرة أتفرج على الجو ده شكله إيه
بس لو أتحبست...... هطلع ؟؟؟؟؟؟؟؟
المهم لبست هدومي وظبطت نفسي على إني راجل محترم نازل من بيتنا
ورايح آخد شوية صور للمظاهرة وبعدين أروح شغلي وأقضي بقيت اليوم
شيء عادي جداً وطبيعي لأي حد
ونزلت لقيته في وشي واسمه شمس وهو اسم مش على مسمى أصلاً
وقاللي
طبعا لا يخفى على حضراتكم ان الي الان انا كنت بضحك على نوشة و هو مش عارف انا كنت عارف ان هو متضامن مع غزة و نفسه يعمل حاجة بس مش بيحب المظاهرات
و لا انا و الله انا واخد على الوقفات السلمية اقف اقول رايي بكل ديموقراطية ( و محدش يتريق على ديمقراطية دي ) و امشي بعد كدة طبعا رحت خطفت الواد و انا على اتفاق مع الجيزاوي ان احنا نتقابل هناك و وصلنا فعلا التحرير على الساعة 11:50 قبل موعد قيام المظاهرة بدقائق الوضع هادئ تماما عساكر الامن المركزي اكتر من عدد شعر راسي الابيض و الاسود مع بعض و فجأة

لقينا الدنيا هاجت وولعت مرة واحدة بقدرة قادر

والدنيا اتلمت والهتافات اشتغلت والكل بيجمع نفسه

ولقيت الواد اللي اسمه شمس بيشدني لجوة قلب المظاهرة
أقوله يا عم الحج مظاهرة إيه وبتاع مين
قاللي
شئ طبيعي لما تحس ان حد بيتكلم باسمك و بيقول كل كلمة انت عايز تقولها لازم تقف جانبه و تقول معاه الله اكبر و ربنا معاكي يا غزة ما هو مش معقول طول ما انت مصري او عربي ما تحسش بالكلام دة و بعدين بصراحة انا حاولت اني محسش بالكلام دة بس انك تشيل حب حد من قلبك مش حاجة سهله و الي المظاهرة
المهم دخل المظاهرة وسابني برة لايص ومش عارف أعمل إيه
وأنا بقى أبص يمين ألاقي دبابير كتير
أبص شمال ألاقي دبابير أكتر
أبص ورايا ألاقي عساكر أمن مركزي زي الرز
ومبقاش فيه قدامي غير إني أدخل جوة قلب المظاهرة
ودخلت لقيت شمس بيشدني من إيدي وبقينا في وسط الناس كلها
وووسط الهتافات اللي حركت جوايا حاجات كتير
لدرجة إني لقيت نفسي بهتف معاهم من قلبي


وفضلنا نهتف شوية حلوين حوالي 10 أو 15 دقيقة
وفجأة لقيت قدري اللي كان السبب في كل ده

بيشدني من إيدي تاني ولقيت عساكر الأمن المركزي

بتزق فينا يمين وشمال وبقى ضغط كبير جداً على المظاهرة

لدرجة إننا اتخنقنا من شدة الزحمة والزق

وشر البلية ما يضحك بقى إني اتخنقت بجد ونفسي خلاص اتسحب مني

ومبقتش عارف إني أقف ولا حتى آخد نفسي

ولقيت واحد ابن حلال كده واقف جنب السور بتاع التحرير

فقلتله شدني نحيتك علشان مش قادر آخد نفسي

فلقيته رد عليا وقاللي ..... أصمد يا أخي فالنصر قريب !!!! والنبي أرد عليه أقوله إيه

واحد مش قادر ياخد نفسه وشوية كمان هيموت بجد وده يقوللي كده

وأرجع تاني للي شدني من إيدي ولقيته

طبعا مش عارف اقول اية غير اني اهتف و احنا بنندفع ناحية شارع انا في حالتي العادية عارفة جدا بس من يومها نسيته و مش عايز افتكره و نوشة بيموت جانبي و طبعا اللي اتعرف علينا قبل كدة عارف معلومة مهمه جدا ان احنا نتسم بالطول ( طواااااااااااااااااال جدا ) لدرجة ان الاخ اللي كان قدامي كانت عنية في صدره و مع دفع الامن انطلقنا على شارع معروف و انا كنت فاكر ان الامن عايزنا ناخد المظاهرة لشارع معروف اتاري مش دة الصح ، و الصح بقى و اللي حصل هيكمله نوشة

الأخ شمس بقى مكنش واخد باله إننا في وسط المظاهرة

وإن عساكر الأمن المركزي خدوا الأوامر وبدأوا شغلهم الكبير

و بدأو ضرب في البني آدميين عاطل على باطل

اللي تبع المظاهرة واللي مش تبع المظاهرة كمان

فلقيته بيقوللي

طبعا نوشة لو اشتغل مصور هيأدي المهنه بذمة مطلقة لانه كان عايز يصور في عز الضرب وطبعا انا عن خبرة في هذه اللحظات الحاسمة عندي مبدأ ( الجري نص الجدعنه يعني اجري مرتين تبقى الجدعنه كلها ) اجري يا نوشة ، نوشة واقف اجري يا صاحبي الي ان حدثت الطامه

طاااااااااخ اااااااااااااااااااااااااااااااااه ، اااااه

اجري يا نوشة ااااااااه رجلي ، و الحمد لله ما طلش الا رجلي و الاصابات طفيفة و لقيت نوشة فتح في الجري

إجري يا عم الحج إنت ... الله يحرق ويحرق المظاهرات

وده على أساس إنه ورايا ....وبصيت عليه مش لاقيه

وفي الوقفة الغبرة دي علشان أبص عليه لقيت

طااااااااااااااااااااااااااخ آآآآآآآآآآآآه

بس دي واحدة تانية غير الأولى

وأتاريه هو كمان بيبص عليا وبيدور

ولمحته بعيني كده واقف بعيد عني شوية وسط الزحمة و

آآآآآآآآآآآآآآآآآآآآآآآآآآآآآه آآآآآآآآآآآآآآآآآآآه ..... وهات يا جري ما عندك كله

طبعا انا مش هقول ان الامن اللي اضطر يضربنا

لالالالالالالالالالالالالالا دة صداقتنا لبعض و انتظارنا لبعض هو اللي عمل كدة

طبعا من بعد هذا اليوم انا بفكر جديا تاني في موضوع الصداقة دة

وأنا كمان وحياتك

طبعا بعد هذه المعركة الحاسمه لم يكن في وسعنا التوجه الا للافطار بعد علمنا من الجيزاوي ان المظاهرة توجهت الي نقابة المحامين

وكان فيه هناك حصار كبير جداً من الأمن لدرجة إننا قلنا كفاية علينا كده انهاردة ، وده مش بسبب الوضع اللي كنا فيه

ولكنه بسبب الألم الكبير والتعب والإرهاق اللي كنا فيه


و المهم بقى و قبل نهاية البوست دة كان تعبير الامن عن اللي بيحصل

و محدش يسأل خدنا الصورة دي ازاي عشان تطلبت عملية انتحارية ن الدرجة الاولي

على فكرة الصور دي حصرية جدا

اول صورة بس لطشينها من الجيزاوي

عشان كدة جزاه لينا مسموح بلطش اي صورة لاي مدونة


نوشة ---------------------شمس الزناتي

GOOGLE