أخبار انا مش معاهم : نوشة وشمس يهنئون كل الشعب المصري والمدونين خاصة بقرب حلول عيد الفطر المبارك ويارب يكون العيد كله فرحة وسعادة للناس كلها

Tuesday, December 11, 2007

دة بقى اللي نوارة استفسرت عنه

دة يا جماعة اللي نوارة نجم و هي استاذتي استفسرت عنه
هتقلي هو اية
هقولك هو حكاية صغيرة نسمعها مع بعض
بس لازم تكملها للاخر يمكن تستفيد و يمكن تقعد تعيط
و يمكن تقفل المدونة و تمشي لكن الاكيد انك لازم هتفهم و هتعرف حاجة مهمه موجودة في مصر و في العرب
-
-
-
-
على راي عبد الحليم نبتدي منين الحكاية
هنبتدي من المحاسب الشريف / جمال طة على فكرة للي ميعرفش لقب الشريف نسبة الي تحدر النسب من النبي علية الصلاة و السلام
نكمل الراجل دة يا جماعة و لانة محاسب زي كل المصريين في سنه و في عصرة خد بعضة و توجة للسعودية يشتغل هناك و يكون نفسه و هناك اشتغل في احد البنوك و اثبت نجاحه في عمله و دة اللي يأهله ان ينتقل الي بنك اخر و برضة كعادة اي مصري اثبت نجاحة في عمله بشدة و الشئ الطبيعي لانه عايز يبقى انسان عيشته مرتاحة فكر انه يعمل مشروع و هنا بقى تلاقي العقبة
تقلي فية اية
انا اقلك ان القانون السعودي بيمنع امتلاك غير المصري في السعودية طب الراجل يعمل اية
يقتل طموحاته
يحط احلامه في علبة و يرميها في البحر
لا طبعا الراجل فكر انه يستعين بالكفيل بتاعة و يعمل المشاريع باسمه على ان يكون فية بينهم ورق يثبت انه هو صاحب الاملاك دي و بالفعل الشريف / جمال طه فتح صيدليات ادوية و بدأ يتاجر و تزدهر تجارتة
( الناس اللي قلتلها هنتعلم حاجة ادينا بنتعلم ان انت لا تتنازل عن حلمك )
و في يوم من الايام كان يوم منيل ما طلعتلوش لا شمس و لا قمر نزل عمنا جمال او بالمعني الاصح جدو جمال اجازة لمصر بلدة تقدر تقول ان الكلام دة سنة 1992 قضي اجازته السعيدة في مصر و رجع السعودية بلد الاسلام و الحق و العدل و الانصاف ( كل دة تريقة ) و الحمد لله لقى كل حاجة تساوي مفيش
ازاااااااااااااااااااي
انا اقلك ازاي متستعجلش بكل بساطة مكتبه مكسر و اوراقه مسروقة و لا يوجد سند يثبت ان الاملاك دي بتاعته يعني من الاخر شقي عمره ضاع و اصبح لا يمكلك شئ
طبعا انا هحاول دلوقتي اتصور الموقف واحد في بلد غريبة لا لية عزوة و لا ناس و لا اهل
و اصبح لا يمكلك مال و لا اي شئ يعمل اية ؟؟؟؟؟؟؟؟؟؟؟؟؟؟؟
طبعا الباشا اللي هيقول لنفسه عوضنا على الله يقفل المدونة و يمشي عشان ما يتعبنيش
عم جمال امن بقول رسول الله علية الصلاة و السلام " من مات دون ماله فهو شهيد " و صمم يدافع عن حقة
طبعا هو صمم يرجع حقة و المبدأ و المقولة اللي هو مشي بيها قلناه
هتقلي طب كان مبدأ السعوديين اية
اقلك المبدأ القائل " انا و اخويا على ابن عمي و انا و ابن عمي على الغريب " مبدأ واطي عارف و الله بس هما اتبعوه و نسيوا قول رسول الله صلى الله علية و سلم عندما سئل
كيف انصر اخي ظالماً
قال
ادفعة عن ظلمة
قعد الشريف / جمال يناضل عشان حقة من 2/11/1992 م و حتى تاريخ 8/5/2005 م طبعا تقلي
و في الوقت دة كله كان بيعمل اية
الخصلك الموضوع انه في الوقت دة اتسجن اربع مرات بدون اي تهمه و فضل يناضل مع الطريق الوحيد اللي قدامه اللي هو القضاء و القضاء يماطل و السلطات السعودية تزور لحد ما رجع مصر 8/5/2005 م و هو لسة ما اخدتش حقة بس رجع
رجع بلده يعيش في وسط اهله و ناسه على الاقل مطمن انه في بلده مش هيتعذب في بلد غريب
مع ان و الله يا عم جمال المصريين برة و جوة متعذبين
الراجل دة يا جماعة بالرغم من انه عن عمر يناهز الـ 57 سنة إلا انه عنده صبر و اراده للدفاع عن حقة
طبعا بعد البوست الطويل دة انا برضة زي كل بوست هقول انا كتبت دة كله لية
عشان مينفعش ابدا لاي حر مهما كان و انا عارف قد اية عالم المدونين مليئ بالاحرار انه يشوف حد بيطلب التضامن و لا يتضامن معاه و اللي طمني لكدة هو تضامن مدونين احرار مع قضية الشريف / جمال طه و كان منهم
نوشة
طبعا مش محتاج اقول اني متضامن و إلا انا بكتب دة كله لية لكن اللي محتاج اقوله
هو لما كلمت المدونة الرائعة بنت الاسلام و قلتلها عايزين نبدأ بحملة للتضامن مع الشريف جمال طه ردت رد رائع و قالت
البداية عندك يا زعيم
عشان كدة يا جماعة احنا بدأنا
انا عرضت عليكوا الموضوع و عشان زي كل مرة اعرض مصدقية كلامي
دي مدونات الضحية / جمال طه
هتلاقوا فيها مستندات رسمية و تفصيلية باللحظة و الثانية لكل كلمة انا قلتها ياريت كل مدون حر و كل مصري حر يقراها و هتبع نفس اسلوب استاذتي نوارة و هطالبكم بالتضامن معاه
و دة يا جماعة لنك جروب التضامن مع جمال طه
انا بقدم شكري لكل اللي اشتركوا في الجروب دة
بس احنا محتاجين دعم كل الناس و تأييدها
فاضل طبعا حاجة واحدة بس مقلتهاش
مع تحياتي
------------------------
-----------------------

8 comments:

بنت الاسلام said...

بوست رائع ياشمس

وحقيقي انا مكنتش اعرف تفاصيل القصة بالشكل ده خالص

يعني جدووو من 92 لسنة 2005 وهو في السعودية وبيدور علي حقه

لاحول ولا قوة الا بالله

احنا معاك ان شاء الله متضامنين بكل قوتنا وبالي ربنا يقدرنا عليه

هنشترك في الجروب

وان شاء الله نقدر كلنا نعمل حاجة لانسان عظيم صبر وصابر لغاية مايرجع له حقه

وان شاء الله هيرجع

إسلام said...

شمس
بوست رائع جدا
وبجد نقول حسب الله ونعم الوكيل
حتي السعوديه بتعمل كده في المصريين
وامل احنا عملين نقول لازم عرب تكون ايد واحد فين ده كله
اذا كان السعوديه بتعمل كده امال
الدول الاوربيه ليه حق تعمل اكتر من كده
ويارب يصبر ه ويعوضه خير ان شاء الله

EmY said...

الكلام ده بجد الراجل ده صادق ولا ايه
الموضوع ده مثير جدا و لو صاحب حق لازم الكل يساعده
ليك تاج عندي انت و نوشه

رانيا الجبالي said...

بجد احيك بوست حلو اوي اما الحكايه فتعليقي عليها كلام انا كتباه ومؤمنه بيه اوي
انا سامضي
والعالم سيبقي
وستبقي السيوف مرفوعه
وكلمة الحق ممنوعه
وستدور الدنيا في دائره
تاركة لنا قلوب حائره
قلوب بالذل لاترضي
من بعدها العالم سيبقي
وانا سامضي

appy said...

ازيكم دى اول مرة اجى هنا
بس انا عندى مشكله مشابهه لكده فى لامدونة بتاعتى بس فى قطر يا ريت تشوفها بس انا مناقشها من ناحية بتوع حقوق الانسان لان الشخص صاحب المشكله قدم شكوى ومحدش سمع
ولا هما بس قاعدين للغلطات التانيه اللى بتفرقع ما دى حقوق انسان برضه
اسمه عندى حقوق المصريين فى الخراج ومن يحميهم اتمنى انكم تشوفوها وكمان الشريف/جمال طه عارض مشكلته عندى وأيدنى فى موضوع حقوق الانسان فى بوست تانى بتاع اغتصاب برائة طفله

amany said...

من سنة 92 ل2005 ؟؟؟
يضيع حقه ويتسجن ويتبهدل

احنا عايشين فى غابه ولا اى

انا معاه بجد انه مش لازم يسيب حقه مهما كان
يارب فعلا نقدر نعمله حاجه
انا بقرا البوست مش مصدقه كانه بقرا فيلم عربى ..مفيش انسان يستحمل كل دا
فجاه احلامه الى عاش عليها واجتهد وحققها تتحول لسراب ؟؟

بس ربنا معاه واحنا كمان ياريت نقدر نقدمله حاجه وان شاء الله يرجعله حقه

kafrawy said...

امال فين راعى السعودية و السعوديين

فين راعى مصر و المصريين

ولا كلة فااكس هنا و هناك

شد حيللك يا استاذ جمال

ربنا مش بيظلم حد و حقك ان شاء الله راجعلك

nonoymm said...

اول زيارة وان شاء اللهع مش الاخيرة
مدونة رائعة جدا
متضامنة معاكم وربنا ينصر الحق
وما ضاع حق وراءه مطالب
وحسبي الله ونعم الوكيل
منتظرة موضوعاتك بشغف

GOOGLE