أنا مخنوق
ــــــــــــ
طبعاً أي حد هيرد عليا ويقولي ليه
مالك .... خير فيه إيه ؟؟؟؟
حرد على أي حد وأقوله
والله العظيم أنا مش عارف مالي فيه إيه
أو حتى مخنوق من إيه
مرة واحدة كده وبدون سابق إنذار
لقيت نفسي مخنوق وقرفان من كل حاجة
لأكبر الأسباب أو حتى أتفه الأسباب
وبدأت كمان من خنقتي
أني أخنق اللي حواليا
وبرده لأكبر الأسباب أو لأتفه الأسباب
حاجات كتير أوي أصبحت بتضايقني
حتى من سماع سيرتها أو إسمها
أو حتى كمان وصفها
وأفعال بقت غريبة عليا وبقيت بكرهها
ولو أني كنت بعملها قبل كده
لحظات بتيجي عليا ببقى فرحان ومبسوط
وطاير بالدنيا كلها
ولحظات تانية بتيجي عليا ببقى حزين ومكبوت
والدنيا كلها غلط حواليا
مبقتش عارف فيه إيه ؟؟؟
ولا حتى أعمل إيه ؟؟؟؟
ولا حتى أعمل إيه ؟؟؟؟
ويا ترى هل أنا صح ولا أنا غلط ؟؟؟
برده مش عارف
بس اللي خلاص عرفته وقررته
أني لازم أنزعل وأبقى لوحدي شوية
بعيد عن كل الناس القريب منهم والبعيد
علشان أقدر أجمع دماغي وأفكاري من جديد
وأعرف ........وبعد كده أقرر
أنا صح ولا غلط
وفي الوقت ده طبعاًمش قادر أقرر
أو بمعنى أصح مش عارف أقرر
هل أنا صح ولا غلط ؟؟؟
وهل دي مرحلة عادية بسبب تغييري
ولا أنا بقى خلاص محتاج دكتور نفسي
أتمنى أني أعرف هل ده شيء طبيعي ولا إيه ؟؟؟
ـــــــــــــــــــــــــــــــــــــ
NOSHA
ــــــــ
51 comments:
مش غلط حالتك يا نوشا دي حاجه طبيعيه اوي
و كمان في حاجات كتير اوي حوالينا تخنق
و مش لازم دكتور نفسي لسه شويه علي المرحله دي
إيمي
أشكرك جداً على تعليقك وعلى تشجيعك
والحمد لله إن في حد قالي إني لسه سليم ومبقتش مجنون
تحياتي ليكي جداً
ايه يعم مالك ارحم نفسك شويه وبلاش الخنقه دى عشان انا اكتر منك ويبقى مخنوق على مخنوق ما يرولش
عمر الشرقاوي
هههههههههههههههههههه
أهلاً وسهلاً بيك في مدونتي المتواضعة نورت المدونة والله
وبالنسبة للموضوع ده بقى فهي حقيقة مرة ومش عارف والله أعمل إيه بجد ؟؟ بس تقريباً كده دي عدوى عن كتير من الشباب
ربنا يصبرنا بقى
تحياتي ليك
هى لسه واصله لك الخنقه ؟
انت ساكن بعيد و لا ايه ؟
اصلها ماشيه ع كل المدونين واحد واحد
انا كنت مخنوق لدرجه من فتره لدرجه انى فكرت فى تغير اسم مدونتى واخليها مخنوووووووووووووووووووووووووووووووووووووووووووووووووووووووق
يالله ربنا معانا
كده يبئه الدور ع شمس
" و من يعرض عن ذكري فإن له معيشة ضنكا و نحشره يوم القيامة اعمى "
ـــــــــــــــــــــــــــــــــــ
طبعاً انا اقصد ان الناس لازم تتجه للدين شوية عشان ربنا يكرمنا
بصراحه الخنقه دي حاجه عاديه خالص
وبتحصل لكل واحد
ونصيحه مني انك متبعدش عن الناس
دنتا المفروض تقرب منهم
و النبي الواد اسلام على حق
ممكن تكون مخنوق و انا مخنوق اكتر منك يا بني دة انت وصلت متأخر انا مخنوق من زمان
بس احسن لك متبعدتش عن الناس
يمكن تعرف تخلص من خنقتك و احنا نخلص معاك
سبه على الله ومش لوحد
مصر كله الان مخنوقه بس قول يا رب
احمد الجيزاوى
كثيرا ماتتكاثر علينا هموم الحياة وتزداد لتصبح جبال فما ندري بانفسنا الا وقد سيطر علينا الهم وماندري الا والاختناق ملك علينا كياننا..كلنا كذلك ياصديقي
شغلتنا الدنيا والناس انشغلنا بهمومنا المادية ونسينا غذاءنا الروحي احتياجانا المعنوي الي الراحة والهدوء والسكينة تقرب الي الله اكثر واكثر وثق ان سجدة واحدة بين يديه خاشعا كفيلة بازالة كل هم وحزن وجديرة بان تعيد لقلبك سرورا ولعزيمتك همة ولاقبالك علي الحياة ومشاغلها رونقا وجمالا
اخي العزيز..لاتبخل علي نفسك بسجدة يتخللها دموع الندم ودعاء لطلب العفو والغفران ولاتنسانا من صالح دعاءك
مارو
والله يا أخويا يا مارو تقريباً كده زي ما قلت لعمر الشرقاوي إن دي عدوى
ولكن يالنسبة ليا دي حالة واقعية بجد ومش عارف أعمل إيه ؟؟؟
تحياتي ليك يا مارو
هشام رمضان
عندك حق والله يا هشام وأحييك على ردك الجميل .........ولكن
في أمور دنياوية كتيرة أوي بتتمثل في طبع الناس ونفوسهم وشخصياتهم أكيد بتبقى سبب كبير أوي في الخنقة دي
إسلام
والله أنا عايز أقولك حاجة صغيرة إن الخنقة بالنسبة للي في سني وخبرتي مش حاجة عادية .... أما بالنسبة بقى أني أقرب للناس لالالالالا ... لأني لو قربت مش هقدر أعرف هل أنا صح ولا غلط وهدخل في مناقشات طويلة أنا في غنى عنها
شمس
بقولك إيه ؟؟ أنا معرفش أنت مخنوق أو مضايق من إيه ومن أي موضوع ؟؟؟!!! لكن أنا بتكلم عن نفسي وعن شيء معين
أما بقى بالنسبة لكلامك فأنا زي ما رديت على إسلام كده معنديش إستعداد أني أفك خنقتي مع أي حد لأسباب ذكرت منها حاجات والباقي مقدرش أني أعلن عنها حاجة
أحمد الجيزاوي
الحمد لله والشكر لله دائماً بنقول يارب
بس تعمل إيه بقى في نفوس وشخصيات وطباع البشر
ملحوظة :ـ يا ترى أفرجوا عن النت بتاعك ولا ده النت الجديد ولا بقى سايبر يا عم جيزاوي ؟؟؟
تحياتي ليك
بطة بكر
أشكرك جداً على نصيحتك الغالية جداً والجميلة والحل لكل مشاكل الدنيا
ولكن ممكن تفهمي وجهة نظري من ردي على تعليق هشام رمضان
تحياتي ليكي يا بطة وأشكرك على زيارتك
شوف بقى يا نوشا
حالتك مش جديدة
ومش فردية
دا شيء عادي جدا
ومنتشر جدا جدا
يعني ما تقلقش الحكاية مش محتاجة
طبيب نفسي ولا حاجة
وبعدين اللي حاصلك دا طبيعي
لان دا هو التطور الطبيعي
لمرحلة التغير اللي انت بتمر بيها
لان واضح من كلامك انك في امور كتير جدا
بتنتقل من النقيض للنقيض
مشكلتك انك متخيل
انك هاتمسك عصى سحرية
وتقول خلاص لازم اتغير
وتتغير
من غير اي دوشة
لا انت لازم تتوقع اللي حاصل دا
انت بقالك كام سنة
بطبيعتك القديمة ايا كانت
مش هاقولك ان المشكلة في تأقلمك
انت مع تغييرك
لا المشكلة في المحيطين بيك
والاجواء المحيطة
لما بيكون في تنافر بين شخصيتك الجديدة
والجو المحيط بيك
تبدأ من هنا الخنقة
وتبدأ الصراعات الداخلية
هل انا صح
ولا غلط
الحل اه في انك تقعد مع نفسك
وتشوف انت فين بالظبط
وعايز ايه
لكن تعمل دا من غير ما تعتزل الناس
عايش وسطهم
ولازم تختبر نفسك وانت في وسطهم
هم دول البيئة المحيطة للتجربة بتاعتك
هم الترمومتر
مش المقصود انهم هم اللي يقيموك بشكل
مطلق
لكن هم دول اللي بتشوف النتايج اللي بتوصلها
منعكسة عليهم
علشان كدا
علشان تقدر تفهم نفسك
لازم تفهم الناس
تفهم التركيبة كلها مع بعض
انت وهم
علشان تبقى فاهم هم عايزين ايه
وليه
وتقدر تحسم جواك هل دا اللي هم عاوزينه
مناسب لك ولا لا
اعرف نفسك وانت وسط الناس
علشان تتخلص من تاثيرهم عليك
الاخ الفاضل
ربنا يشفيك ويشفينى ويشفى كل مريض
ما تتحدث عنه محتاج طبيب نفسى ليس لا سامح الله علشان انت مجنون لالالالالالالالالا
فعلا الاعصاب تحتاج لبعض الراحة ونحن لا نهتم بذلك خوفا من كلمة طبيب نفسى
بص على كل المصريين وهم جلوس ترى ارجلهم ترتعش
ليه توتر
على العموم اول مراحل العلاج تحديد الداء وانت قمت بذلك لذا انت على الطريق الصحيح
شكرا لك وعفوا اذا كنت تجاوزت معك فى كلامى
ما علينا
كل حرف من كلامك فعلاً بجد صح 100 100 والله فعلاً أنا كنت محتاج أني أعرف إذا كنت صح ولا أنا غلط وأعتقد إن بداية الطريق عرفته منك
أشكرك على نصيحتك الجميلة
تحياتي ليكي
أستاذ / حسن توفيق
أشكرك جداً على نصيحتك الغالية وعلى زيارتك الجميلة ليا وأنا كده بقى أبتدي أحجز مكان ليا عند دكتور من دلوقتي
تحياتي ليك جداً
لقد تناوبتنا تلك الحاله
و بصراحه لم و لن تأتى لشخص منشغل بهدف
دا عادىىىىىىىى
جدااااااااااا
وبيحصل لنا كلنا
بس انتى متركزيش مع الموضوع دا
اعتبريه حاجة عادية جدا
خالص تحياتى
أبو مفراح
الموضوع وما فيه إن دي خنقة جت من غير ميعاد ومش عارف جت ليه ولا إزاي ولا حتى أعمل إيه علشان أخرج من الحالة دي
وعلى فكرة والله العظيم دماغي مشغولة ب 100 حاجة وحاجات مؤثرة مش تافهة بس تقول إيه بقى
أشكرك على زيارتك وتعليقك الجميل
اه يا دماغى
على فكرة أنا عارف جداً أن دي فترة صغيرة وهتعدي إن شاء الله بس لازم أركز طبعاً علشان أعرف الصح فين والغلط فين من اللي أنا بعمله
أشكرك على زيارتك ومستني زيارات تانية .. وعلى فكرة أنا شاب مش بنت
سلام
إزيك يا نوشة دماغك عاملة ايه بعد كوم النصايح اللي تلقيتو من الأصدقاء ؟؟؟
ويا ترى الخنقة حتتحل بالنصايح ؟؟
والا حتى بالتعاطف ؟؟
والا حتى بأي حاجة ؟؟
يمكن دي اسئلة نوشة وبس اللي يجاوب عليها
بس يمكن حقولك حاجة ممكن تضيفها لقائمة النصائح اللي تلقيتها وممكن تحطها بالفعل وتطبقها
ما تبعدش عن حد وما تسألش نفسك كتير انت مخنوق من ايه
لأنك حتكبر دماغك عالموضوع وتبتدي تعكس ما في داخلك وتنزعج وتزعج اللي حوليك وهوة فعلا ما حصل معك
ببساطة
جرب شيئا مختلفا خد نفس عميق ودعمو بأفكار جميلة وتوقف واستنشق الزهور وحاول تتزكر حاجات جميلة وبتحبها واعملها وقولي على النتائج
واكيد حياة تستحق الإنقاذ
ام المييس
أم المييس ــ مجموعة حياة
كلامك كله جميل جداً ومتعرفيش هو أثر فيا أد إيه لأنه هو ده فعلاً اللي حصل معاية بجد وانا هجرب نصيحتك مع النصائح التانية ومتأكد جداً إنها هتجيب نتيجة كويسة وهقدر أرجع من جديد
أشكرك جداً على زيارتك
تحياتي ليكي
أزيك ياعم نوشة وأخبارك أية حتى الاميل مابترودش عية مافيش موشكلة بس أنت تعرف أن الانعزال شئ كويس موش وحش والله العظيم أسئلنى أنا أنت عارفنى صاحب الحظ السئ ياما أنعزلت كتير وكان أخرها المستشفى وأسلام أخوك عندة حق فى ردة وعلى فكرة كل أصحابك المقربين ليك أنا وشمس ومدحت وعمرو مستنيينك ترجع تانى وتنور لاماكن بتاعت زمان ودلوقتى وأتمنالك التوفيق من كل قلبى ...ماشى يا فهد
أول حاجه الحاله
دى عاديه جدا جدا
وبتجلنا كلنا ومفيش أى حاجه غريبه
ومش حتاجه دكتور ولا حاجه
دى محتاجه أندماج أكتر
أوعى تنعزل عن الناس أو عن ألى حوليك
أرجع تانى حتى فى عز الديق أغصب على نفسك الأندماج
محمود التابعي
شكراً على تعليقك الجميل
في القلب
أشكرك جداً على تعليقك بس هل يا ترى لو غصبت على نفسي بالإندماج هتتحل المشكلة ومش هيبقى فيه مشكلة تانية تنتج عن الغصب والسكوت
تحياتي ليكي
نوشة
عزيزي
لمت عليا كتير
حسيتني بأى ؟؟؟
ده مش غلط يا عزيزي
دي أحاسيس و إحنا بشر
لو ما حسيتهاش تبقى مش عايش
و عشان تفهم السعادة
لازم تحزن
والعكس
شدة وتزول يا صديقي
منى
منى
أشكرك جداً على تعليقك الجميل وإحنا فعلاً بشر لازم نحس بكل مشاعر وأحساسيس سواء حلوة أو سواء وحشة وفعلاً شدة وهتزول بإذن الله
تحياتي ليكي
الي انت فيه من صنعك ممكن تخرج من الي انت فيه بسهوله و دي حاجه الكل بيمر بيها في انسان بيستسلم و في انسان لا . و في حاجة عايز اقولهالك انت الي بتتحكم في ارادتك مش ارادتك هي الي بتتحكم فيك . و انت اقوي من انك نستسلم لاي شعور زي ده
احمد نجم
ارجو زيارتك لموقعي لسماع اشعاري
http://a7asessha3er.blogspot.com/
أحمد نجم
فعلاً الخنقة دي أنا فيها بإرادتي وهي اللي فارضة عليا كده بس لو بصينا لمعنى الإرادة هنلاقي إنها ناتجة عن الشخصية والتربية وفكر الشخص نفسه فأظن إن مفيش حد يقدر أنه يتخلى عن إرادته لإنها جزء منه فهل يا ترى بقى أنا كده صح ولا غلط ؟؟
أشكرك جداً على تعليقك وأنتظر منك مزيد من الزيارات وإن شاء الله هزورك دائماً
تحياتي ليك
[ ما أصاب عبداُ هم ولاحزن فقال: " اللهم إني عبدك ابن عبدك ابن أمتك ناصيتي بيدك ماضِ في حكمك ، عدل في قضاؤك أسالك بكل اسم هو لك سميت به نفسك أو أنزلته في كتابك ، أو علمته أحداً من خلقك أو استأثرت به في علم الغيب عندك أن تجعل القرآن ربيع قلبي ، ونور صدري وجلاء حزني وذهاب همي" . إلا أذهب الله حزنه وهمه وأبدله مكانه فرحا[ً رواه أحمد وصححه الألباني
أنا مسلمة
أشكرك جداً جداً على الدعاء الجميل ده وإن شاء الله يكون الدعاء ده أحسن طريقة وآخر طريقة للخنقة دي وجزاكي وجزانا الله كل خير
أشكرك على زيارتك وأنتظر مزيد من الزيارات
تحياتي ليكي
ياااااااااااااه نفس الحالة اللي عندي بالضبط من غير زيادة ولا نقصان
الإنعزال فكرة كويسة بس مش كتير لو كتر حيبقى وحش أوي والحالة حتزيد..ومتنساش ربنا00اسأل مجرب000سلااااااااااام0
الى نوشا - انا محمود صاحب مدونة لماذا أنا ؟ - قد لا أعاتبك بالمرة على حالتك لأنى لا اختلف عنك كثيراً ولكن تبقى أصابع يدك مختلفة - إسلوبك رائع وممتع وأتمنى لك النجاح دائماً - تحياتى لك
أحمد المصري
أشكرك جداً على نصيحتك الغالية وأنا طبعاً مش هنعزل عن الناس العمر كله لكن لبعض الوقت بس أريح أعصابي وأجمع أفكاري من جديد
تحياتي ليك
محمود
أشكرك جداً على الإشادة وأتمنى إن لو فيه أي شاب في الموقف ده أو المرحلة دي إنه يخرج منها بسرعة
أشكرك على زيارتك وأنتظر منك مزيد من الزيارات
تحياتي ليك
ماهى المشكله اختى اننا فعلا عندنا 100 حاجه بس مش عارفين ننشغل باى حاجه منهم ...... انتى فهمانى
سلام
اولا اللی بیحصل معاك شيء طبيعي مئة في المئة
ولنكن واقعيين أكثر اللي بيحصل معاك أقل من الطبيعي
يعني لو أخدنا بعين الاعتبار كل الاحداث في العالم وحوالينا
الخنقة هو أقل رد فعل ممكن يحصل
يعني كويس انك لا سمح الله ما بتفكرش بالانتحار مثلا أو الانحراف اواواواواو...
هي مسألة وقت وحترجع زي الأول
وعلى فكرة فكرة الانعزال لفترة قصيرة مش بطالة
لكن بكرر لفترة قصيرة بس
عشان ما يتحولش الموضوع جد وما ترجعش تندمج مع الناس :)
ربنا يخفف عنك يارب وعن كل المخنوقين والمتضايقين
تحياتي
حفلة الصحبجيةالرابعة وعيد ميلادها يوم الاتنين الجاي 10 \9 \2007
بجد يا جماعة نفسي كلنا نتجمع اليوم ده..بقالنا كتير قوي متجمعناش وكل واحد مشغول في حاجة...مستنيكم يومها الساعة 8 بساقية الصاوي"قاعة الحكمة...
knock knock knock
ممكن أدخل ؟؟
لسه متضايق يا نوشة ؟
بالله عليك لا تفكها يا جدع
إن شاء الله
بكرة ترووووووووووق و تحلى
منى
أبو مفراح
أشكرك جداً على نصيحتك الغالية
وعلى فكرة أنا شاب مش بنت
تحياتي ليك
شهيدة
فعلاً ده شيء طبيعي بالنسبة لأي حد بس المشكلة بقى أني كنت عايز أعرف هل أنا صح ولا غلط
والحمد لله عمري ما أفكر أبداً في الانتحار لإن مفيش حاجة تستاهل يعني لأن كله بأمر بنا وقدر اللهم لا اعتراض
شكراً على زيارتك الجميلة
frozen love
إن شاء الله لو في وقت ممكن أكيد هنكون معاك
منى
أنت تدخلي في أي وقت براحتك الدار دارك .... وعلى فكرة الحمد لله كله بقى تمام
مع اني اول مرة ازر البلوج دي و مش عارف شيخيتك الا اني اصر علي انك اكيد عارف سبب الخنقه و بتحاول تهرب منها ...
ممكن يكونو سبب واحد و ممكن يكونو اكتر من سبب ... الله اعلم انت الوحيد الي تعرف نفسك كويس ....
بس الحاجه الوحيده الي اقدر اقولهك ...
صلي ركعتين لله ...
استخير لو مخير في حاجه و مش عارف
تختار ...
ارمي تكالك علي الله ..
و ثق في اختيار الله ...
ربنا معاك و معانا يا رب ...
كلنا بنمر بظروف زي دي ...
بس الواحد لازم يحاول يمشيها بسرعه علي قد ميقدر لان مفيش حاجه في الدنيا مستاهله كدا .
أحمد الصاوي
أشكرك جداً على نصائحك العزيزة والغالية والحمد لله على كل شيء لكن دلوقتي بقى كله تمام وزي الفل الحمد لله
تحياتي ليك
والله يا محمد يا خويا , إن كان عالخنقة هاتلاقي الشعب كله إلا شوية صغيرين مخنوقين وطالع عنيهم وعاوزين يباتوا عند دكاترة نفسين , يعني دي حالة عامة , يعني ما تقلقش , ولا تفكر , وخليك عايش مستبهل زى باقي الشعب , عيش , أطرش عن سماع اى صوت يدايقك , وأعمي عن أى منظر يجبلك الحسرة , وأخرس عن أى شيء ممكن ينزلك تحت الأرض عند أخوانا البعده , ساعتها ممكن في يوم تتفك من الخنقة ولا إيه
رمضان كريم
Post a Comment