بعد جرحه ليا يا قلبي قلتلي استحمل
ما هو برده حبيبك وروحك فيه
رديت عليك وقلتلك
ده باعنا وخاننا وسابنا أنا وأنت لوحدنا
قلتلي يا قلبي لا مفيش حاجة من الكلام ده أصبر عليا
وأهي فترة وهتعدي ومسيرنا نرجع لبعض بس أصبر شوية عليا
رديت عليك وقلت
أنا اللي يبيع ويخون عمري ما أقدر أستناه ولا أفكر فيه تاني
قلتلي مسير الأيام تثبتلك كلامي
ولما يرجع لحضنك تاني هتقول أنك الغلطان مش أنا
رديت عليك وقلت
على العموم أنا معاك وعمري ما هقدر أسيبك
بس لازم تعرف يا قلبي
أنك كده كده خسران وبتجري ورا سراب مالهوش آخر
وعدت الأيام يا قلبي ومرت الشهور
ودلوقتي بس أنت أتأكدت وصدقت كلامي
خلاص يا قلبي أنسى وفكر بواقعية
خلاص كل حاجة راحت لحالها
وهو ما صدق أنك بعدت عنه لأنك كده كده مش فارق معاه
ولا أنت حتى في دماغه
عارف ليه
لأنه عمره ما قدر حبك وإخلاصك
وعمره ما صانك وحس بيك
وأنت يا مسكين عمال تدي من غير حساب
وتديله الحب والحنان وكل حاجة حلوة
لكنه للأسف
ميعرفش معنى الحب
ولا يعرف حتى إزاي يحب
ولا حس في يوم باللي انت عملته معاه
على العموم يا قلبي أنا مش زعلان منك
ولا هلومك على اللي حصل
بس صاحبك عقلي كان صح
وأنا غلطان أني مسمعتش كلامه
ودلوقتي لازم أقولك أوعى في يوم تغدر أو تخون
وتحاول تنتقم و تخلص اللي حصل معاك
لأن الانتقام والغدر و الخيانة مش طباعك و مش ليك
بس مش معنى كلامي أنك تبقى ضعيف
أنا عايزك قوي وأقوى من الأول كمان
وأنا وأنت وصاحبك عقلي لازم نكون مع بعض على رأي واحد
وعمرنا ما نختلف أبداً لأننا من غير بعض هيبقى كل واحد فينا تايه
ونرجع لنفس الحكاية
وفي الآخر كل اللي هقدر أقوله ليك حاجة واحدة بس
هي
صدقت كلامي يا قلبي
أنا طبعاً عارف أنك مش مصدق
لأنك أنت مش معاهم
NOSHA
12 comments:
نوشا
الحمد الله حجزت كرسى كبار الزوار انا الاولى
القلب الى يغدر يخون ميستهلش حتى التفكير فيه
هو الى خسران لان نادر فى الزمن ده حد
يحب حد بالاخلاص ده
وديما يارب يسلم قلبك
يارب يكون القلب اتعلم و نسي بقى
و يارب ننسى و نفوق و ندور على حبيب جديد
و اللوم مش عليك اللوم على قلبك اللي صدقها
حبيبي يا هش قصدي يا نوشة
فى جرح لا يشفيه الايام ولكن يجب ان يموت او يظل ينزف ولهذا انا افضل ان يموت
ليسطيع القلب ان يستمر من جديد
احمد الجيزاوى
كلامك حلو اوى
في القلب أهلاً وسهلاً بيكي وياريت دائماً تكوني في كرسي كبار الزوار ودائماً كده القلوب اللي فيها الغدر والخيانة هي اللي بتضيع القلوب المخلصة
تحياتي ليكي جداً
شمس حبيب قلبي القلب اتعلم ونسي خلاص وأنت عارف كده كويس بس يا ترى بقى الحبيب الجديد هيجي الجرح منه برده ولا مني أنا وأبقى في الحالتين مش عارف أعمل إيه ؟؟؟
أستاذ أحمد الجيزاوي أهلاً وسهلاً بيك وأنا مبسوط جداً أنك زرت المدونة بتاعتنا أنا وشمس وحقيقي تعليقك جميل جداًَوبسيط وأتمنى المزيد من زياراتك وتعليقاتك الجميلة لينا تحياتي ليك
مارو ربنا يخليك على الإشادة الجميلة دي وأتمنى أنك تداوم على مدونتنا وياريت دائماً يعجبك كلامنا
ماتلومش على قلبك
وبعدين ما حدش بيتعلم بلاش
واديك ازدات قوة من التجربة واتعلمت منها
انها توازن بين قلبك وعقلك بعد كدا
وبلاش تدور على حب جديد
تخلص اولا من كل اثار التجربة الاولى وعيش حياتك و استمتع بيها
وقدرك سياتيك
ما علينا
أشكرك جداً على تعليقك وطبعاً اتعلمت كتير من التجربة
بس طبيعي لازم ألوم على قلبي لأنه هو السبب في كل ده
شكراً على تعليقك وتحياتي ليكي
انا مش معاهم...يا قلبى
اول مرة اقرالك يا نوشة
ولذيذ انك بتكلم قلبك زى ما يكون واحد صاحبك
الحقيقة انا خفت عليه فى الاخر لا تقوم تلطشة قلمين
بس هو جدع وخلع
وطلع مش معاكوا
:)
تحياااتي
أبو مفراح
أهلاً وسهلاً بيك في المدونة
بنوتة من وسط البلد
نورتي المدونة ومعلش بقى أنا مقدرش أديله قلمين دلوقتي هو اللي فيه مكفيه
شكراً على تعليقك
تحياتي
ودلوقتي لازم أقولك أوعى في يوم تغدر أو تخون
وتحاول تنتقم و تخلص اللي حصل معاك
لأن الانتقام والغدر و الخيانة مش طباعك و مش ليك
ياريت فعلا
مهما انجرحت بلاش تجرح
مهما اتظلمت بلاش تظلم
مهما اتغدر بيك بلاش تغدر
مش لانك غير قادر
مش لانك ضعيف
مش لانك مستسلم
لكن
لان الجرح
والظلم
والغدر
والخيانة
صفات
مايصحش انها تكون في اي نفس رقيقة نقية صافية
صح ولا ايه
بطة بكر
أشكرك على زيارتك وأنتظر مزيد من الزيارات
وبالنسبة لتعليقك بقى والله فعلاً عندك حق وأنا كاتب الكلام ده لأن فعلاً هي دي الحقيقة للقلب النقي المخلص الخالي من الخيانة والغدر والانتقام اللي بيعرف معنى الحب بجد وعمره ما عرف معنى الكره
تحياتي ليكي
Post a Comment