لحد أمتى هتفضل نفوسنا مش صافية مع بعض ؟؟؟
لحد أمتى هيفضل الجشع والطمع جوانا ؟؟؟
لحد أمتى هنفضل بعيد عن بعض وكل واحد فينا في وادي تاني
وماشي في حاله وبيفكر في نفسه ومصلحته بس ؟؟؟
لحد أمتى هنفضل نقول طيب ونعم وحاضر وأوامر سيادتك ؟؟؟
لحد أمتى هنفضل متفرقين وعمرنا ما نتفق على رأي واحد ؟؟؟
لحد أمتى هنفضل ساكتين على الظلم والقهر والتعذيب ؟؟؟
لحد أمتى هتفضل السلبية واللامبالاة جوانا ؟؟؟
وبعد كل ده بقى عايزين نبقى أحسن
عمرنا ما هنبقى أحسن إلا لما نعرف
إزاي نحب بعض
ونخاف على مشاعر بعض
وكلمتنا تكون من رأينا ودماغنا
ونقف أدام أي حد ونقول كلنا لا لكل حاجة مش عايزينها
نقول لا للظلم والقهر والتعذيب
نقول لا للسلبية واللامبالاة
أنا لوحدي مش عارف أمتى
لأن أنا مش معاهم
9 comments:
امتى دا هاييجي
لما كل واحد يقف مع نفسه
ويسألها اسئلتك دي
ويجاوب عليها
ساعتها بس
هايقدر يحد هو فين بالظبط
ساعتها بس هنبقى يا ابيض يا اسود
ومش هانبقى سلبيين
المصريين
لما الواحد بيضيق عليهم رزقهم
مش بيطالبوا بحقوقهم
بخطفوا من بعض
السلبيه والخوف والامبالاء
والحسوبيه والواسطه
اصبحت امور طبيعيه جدا
لدرجه ان الناس مش بتفكر تغيرها
لانها عايشه بيها
الناس زهقت .. تعبت من كل اللى بيحصل واللى بيحاول يغير فى ميت جزمة على دماغه بتسكته وسلاقى الناس بتهاجمه وتقوله اسكت خلينا ناكل عيش
النس مش عايزة غير تعيش وتاكل عيش وبس مع الاسف
واضح ان نوشة فكر و بعدين قرر و عرف انه مش هيسكت و مش معاهم
طول ما احنا مش عارفين احنا مصريين ولا عرب ولا مسلمين ولا ازاى نرتب الانتماء
طول ما احنا مش عارف نظام بلدنا الاقتصادى رأسمالى ولا اشتراكى ولا حبه مستكه وحبه مش مستكه على راى صاحبى
طول ما احنا بنخلى كل حاجه مؤامره من الغرب وننسى اننا اكتر ناس بتضر نفسها اكتر من الغرب
ونطبل كلمة وانا مالى
ما علينا
هيجي ايوم إن شاء الله اللي كله هيجاوب على الأسئلة دي كلها وساعتها هيحصل كل اللي نتمناه في بلدنا
محمود علي
إحنا محتاجين أننا نفكر في حياتنا كلها من الأول للآخر ونحسبها صح عمرنا ما هنفكر في جنب واحد بس هنفكر إزاي نكون أحسن في كل حاجة ساعتها بس هنسيب اللامبالاة والسلبية للأبد
سلام عليكم
طالما الناس بتدور على أكل عيشها وحياتها وإزاي تعيش يبقى لازم يفكروا للأحسن وإزاي يقدروا يخلوا حياتهم في إيدهم مش في إيد ناس تانية وكل واحد يحدد مصيره وطريقه من غير خوف
إحنا
كلنا عارفين إننا مسلمين والحمد لله وعارفين كمان أن إحنا عرب بس المشكلة بقى إننا عمرنا ما حاولنا نفكر إزاي نتحد إزاي نعرف كل كبيرة وصغيرة في بلدنا ماشية إزاي وتكون فعلاً كل حاجة بدماغنا وبمزاجنا ونعمل اللي الشعب عايزه بس برده يكون في نطاق الاتحاد
شمس
حبيب قلبي طبعاً أنا بفكر وبقرر لأني إنسان ناضج والحمد لله بس اللي قصدك عليه ؟؟؟ أنت فاهمني طبعاً كل حاجة بتيجي في وقتها
شكراً لكل الردود
NOSHA
يراجل انت مش معاهم ليه ماهو يمكن لو كنت معاهم كنت دلتنا على حاجه نعملها
انا اول مره ازور مدونتك وتدويناتك جميله
لحد ما نتجرم لغه الكلام اللى ما بنعرفش غيرها لافعال ونبقى ولو لمره واحده عارفين احنا بنعمل ايه وليه..............؟
Post a Comment