انا معاهم

كنا قد اتفقنا انا صديقاي و التابعي و نوشة على ان نظل دوما مش معاهم حتى كانت مدونتنا انا مش معاهم لكن

لو كل ما هنتكلم عن حد هنقول انا مش معاهم

امال احنا مع مين ؟؟؟؟؟؟

سؤال دق بابي كثيرا و لكنى رفضت الاجابة علية

حتى نشر نوشة صديقي مقالة الاخير لية انا مش معاهم و حسيت بحاجات كتير اوي بيفكر فيها الشباب

حسيت بخوفهم من كل اللي بيشفوه و يسمعوه

خوف و رهبة من كل حاجة

من الامن المركزي و من الاجهزة الامنية من كل حاجة

خوف على المستقبل اللي لسة مش عارفينه و خوف على الحاضر اللي لسة مش عايشينه

و على الجنب التاني انا شايف شباب في حب بلدهم قدوة و مثل

زي عبد المنعم و عمر و نوارة و طارق

انا مش عايز انسى حد

يعني دلوقتي فية وجهتين نظر في حب البلد

نظرية بتقول انا بحب مصر و انا في حالي و نظرية بتقول انا بحبك يا مصر و فداكي لاخر العمر لازم تطلعي و نطلع معاكي

يا ترى انت مع اي نظرية فيهم ؟؟؟؟؟؟؟؟؟؟؟؟؟؟؟؟؟؟؟؟

انا شخصيا من بعد ما كتبت

هفضل فداكي و احبك يا مصر

فطبعا وجهه نظري كدة اتعرفت

ها انا مع اي جنب ؟؟؟؟؟؟؟؟؟؟؟؟

و يا ترى انت مع اي جنب يا ريت تقول

و العموم برضة لسة المدونة على مبدئها انا مع جنب و الجنب التاني انا مش معاهم

------------------

شمس الزناتي

------------------

ليه أنا مش معاهم ؟؟؟

كل بوست بنكتبه تلاقي في آخره أنا مش معاهم

محدش علق وسألني معناه إيه هو أنت مع مين ؟؟؟ ومين اللي أنت مش معاهم ؟؟؟

اللي أنا معاهم هو

الصدق

والإخلاص

والأمانة

والحب

والسلام

وكل حاجة حلوة في دنيتنا الواسعة

أما بقى اللي مش معاهم فهو

الظلم

والقهر

والخيانة

والعدوان

وكل حاجة وحشة تفسد دنيتنا الحلوة

بس للأسف لما تيجي تبص وتدور في دنيتنا لازم تلاقي كل شر وكل ظلم

ويوم تيجي تقول لا

حرام عليكم كده

تلاقي مليار صوت يرد يقولك ده صح أنت اللي غلط وأنت اللي شيطان

وتلاقي نفسك بقيت من واحد بيقول كلمة الحق

تتحول لواحد بيقول كل غلط وكل نفاق

وكل ده ليه

علشان متلقيش نفسك تهت في سكة كلها ظلمة وتلاقي الجحيم

وعمرك ما حتشوف النور أبدآ إلا بمزاجهم وأمرهم

بس أنا إيه اللي يخليني أبقى في الحال ده والموقف ده ؟؟؟

أنا ورايا أهل يموتوا لو حصلي حاجة

غير لما هيجروا ورايا

وحياتهم تبقى مرمطة وحزن

علشان كده أنا بقى مش معاهم

برده محدش هيسألني مش مع مين ؟؟؟

هقول مع أهلي الغلابة اللي تعبوا وسهروا علشان يربوني ويعلموني

علشان كده

خليني في حالي أحسن

لأني أنا مش معاهم ؟؟؟

لفة سريعة كدة

و انا قاعد على النت قلت الف لفة سريعة على الاحزاب كلها وطني و معارضة و اشوف افكارهم اية في خدمة الشباب و بصراحة اللفة كانت مسمرة جدا تعالوا نشوف
طبعاً نظراً لأني من محبين الحكومة ( حاجة كدة في ودنك بكرها بس معلش انا عايز اعيش ) المهم لأني بحب الحكومة فانا هبدأ بالوطني
و من موقع "الحزب الوطني"
تختص أمانة الشباب بدراسة القضايا التي تهم الشباب وبوضع الخطط لتنفيذ سياسات الحزب الخاصة بهم والعمل على نمو عضويتهم بالحزب بالتنسيق مع أمانة العضوية وبما يؤدى إلي زيادة مشاركة الشباب في أنشطة الحزب وتأييدهم له وعلى الأمانة دفع القيادات الشابة وزيادة مشاركتها في مختلف تشكيلات الحزب ومستوياته التنظيمية وحث الشباب على تأييد مرشحي الحزب في الانتخابات البرلمانية والمحلية . وتعمل الأمانة على توعية الشباب بمبادئ الحزب وتشجيعهم على المشاركة في العمل السياسى من خلال القنوات الشرعية وعلى الاهتمام بالقضايا العامة وتعميق انتمائهم للمجتمع وتشرف أمانة الشباب على أمانة الشباب بالأقسام والمراكز والمحافظات وترفع التقارير الخاصة بأدائهم إلى الأمانة العامة للحزب
انا شايف ما شاء الله كل اهتمامهم زيادة اعضاء الحزب و الاهتمام بامور الحزب و حلاوة الحزب و جمال الحزب ، الله يحرق ابو الـ........ و لا بلاش
تعالوا على حزب الوفد
بصراحة انا ما لقتش موقع لحزب الوفد اساسا بس لقيت منتدى الوفد اللي مفهوش حاجة عن الشباب اصلاً و حسبي الله و نعم الوكيل
معلش يا استاذة نوارة انا عارف ان ليكي ميول ناحية الوفد شوية بس الاختلاف في الراي ها ........ كملي انتي
طب نعدي كدة على حزب الغد
بصراحة الناس زي العسل عاملين منتدى مخصوص للشباب و الله عملوا اللي عليهم و من اهم ما وجدت به كان لقيت من اهم مواضيعة مناقشات المؤتمر الاول لشباب حزب الغد (الاسكندريه 9/2/2007 ) اللي هو اساسا بيناقش كيفية تنمية اعضاء الحزب من الشباب و تدعيم الحزب
مع الاخذ في الاتبار طبعا ان دة اساساً حزب ليبرالي

طب انا هتفق مع الاحزاب دي كلها و غيرها من الاحزاب اللي عديت عليها و اللي معدتش عليها و محدش يزعل و هقول ان الشباب هم اللي يهتموا بالاحزاب و ينموا عضويتها طب مين يهتم بالشباب نجيب دولة تانية ترعى شباب مصر نأجر حكومة بتحب الشباب و الله انا مش عارف
على العموم انا من مكاني هذا و من مهرجان الحكومة المصرية للمراجيح و الالعاب و التسالي احيي جميع الشباب اللي بينموا الاحزاب و يطوروها و احب اهديهم اغنية

انا مش معاهم

--------------------------

شمس الزناتي

-------------------------

حوار صامت مع القلب

في يوم سألت قلبي ............. لماذا ؟؟؟

لماذا دائماً ؟؟؟ أنت ضعيف ؟؟؟

لماذا دائماً ؟؟؟ لا تستطيع أن تغير ما بك ؟؟؟؟

لماذا دائماً ؟؟؟ يأتي بك التغير من الخارج ؟؟؟

لماذا دائماً ؟؟؟ لا تنسى من أحببت ؟؟؟

لماذا دائماً ؟؟؟ يظل من تحب بداخلك ؟؟؟

لماذا دائماً ؟؟؟ تشعر بأنه ملك لك ؟؟؟

لماذا دائماً ؟؟؟ لا تفكر في الغدر او الخيانة ؟؟؟

لماذا دائما لا تستطيع ان تفكر في نفسك وحدك ؟؟؟

لماذا دائماً ؟؟؟ تخلص في حبك وتعطي بلا حدود؟؟؟

لماذا دائماً ؟؟؟ لا تنسى جرح من أحببت ؟؟؟

لماذا دائماً ؟؟؟ لا تفكر في الرحيل او الهروب ؟؟؟

لماذا دائماً ؟؟؟ يظل من جرحك بداخلك ؟؟؟

لماذا دائماً ؟؟؟ وأبداً تبكي وتبكي بعد جرحه لك ؟؟؟

لماذا دائماً ؟؟؟ في حيرة ، ولهفة ، وغيرة ، وشوق ؟؟؟

وكل هذا ولا أحد يشعر بك

وبعد كل هذا .... كفاني يا قلب

لم أجد رداً على أي سؤال من هذه الأسئلة

ولكن

يبقى السؤال

؟؟؟ لماذا ؟؟؟؟

أنا نفسي لا أعرف لماذا

لأني أنا مش معاهم

-----------------------

nosha

على القهوة

شاي لو سمحت على الحساب ................. كمان قهوة و النبي على الحساب و لو فيها تقل يبقى شيشة ........ و كان سؤال طبيعي من القهوجي للشاب اللي قاعد على القهوة يائس " لحد امتى " و كانت الاجابة قوية مدوية

قلي انت لحد امتى لحد امتى هفضل من غير شغل متقليش دور عشان دورت و كلهم على نفس الجملة هنتصل بيك و مفيش جديد و طبعا متقليش الحكومة عشان ايدك منها و الارض ، وزارة القوى العامية ما شاء الله اتعمت عن كل حاجة يبقى جاوبني انت لحد امتى تعرف انا خايف في يوم اوصل لأني اعمل حاجة غلط زي فلان و لا علان و اللي موقفني ضميرى و عمال اقول بكرة تفرج و اشرب في شاي و قهوة و ادور تاني طب هعمل اية زهقت



معلش يا صاحبي انا عارف انك زهقت بس دي مشكلة كل الشباب بتواجهها خليك انت الاقوى خليك اجمد و بعدين دة انت تعبت كتير و استحملت هتيأس المرة دي لية



عشان خلاص مفيش وقت كبرت في السن هكون نفسي امتى هتجوز امتى هبقى بني ادم احتفظ بحقي كبني ادم امتى اسيب البلد و اهج يعني و لا اسرق و اهرب مليارات



لا يا صاحبي ربنا معانا و صدقني ربك ما بينساش حد بس انت سيبك من الاستسلام دة و دور تاني و هتلاقي انا متأكد انك هتلاقي و اوعى تقول اسيب البلد دي تاني عشان دي بتاعتنا مش بتاعتهم و لا تقول اهرب مليارات تاني عارف لية يا صاحبي عشان انت مش معاهم



و انت



مستني اقولهالك طب انا مش معاهم

---------------------------

شمس الزناتي

---------------------------

إهداء إلى شاب صديق

لما شفت كلامي قلت كلام غريب ......... قلتلك طيب وليه كلامي غريب .......... رديت عليا وقلت إيه اللي بتقوله ده ......... قلتلك لحد أمتى يا صاحبي هنقضل ساكتين ............ ولحد امتى هيفضل جواك الخوف ........... بص يا صاحبي وماله لما تقول كلامك بس يكون كلام موزون ............. لا يزعل دولا ؟؟؟؟ ولا كمان دول ؟؟؟ بس يكون كلام الأصول ........... تنقع بيه إخواتك الغلابة ........ لو متكلمتش دلوقتي يا صاحبي وقلت اللي نفسك فيه ............. هنفضل ساكت وخايف لحد امتى ودنيتك بتجري من حواليك ......... فكر يا صاحبي في كلامي وأنسى الخوف وأتكلم ............. منعوا عنك كل حاجة حتى الكلام هيمنعوه ........... كلامي يا صاحبي لا هيقدم ولا هيأخر ............ بس المهم أنك تتكلم أوعى تسكت في يوم وأوعى تخاف من تاني ............ ربنا خلقنا عيده مش عبيد الناس ................ ولما تفكر في الخوف فكر إن فيه ربنا وهو مع عباده عمرك ما هتخاف الناس ولا هتسكت عن الكلام ........................... على العموم تتكلم متتكلمش ............................ تسكت ولا تخاف ....... مش فارقة معايا ........................ علشان أنا مش معاهم

حوار اعجبني

عجبني جدا قصيدة لطارق المملوك صاحب مدونة "; شخبطة ملوكي " ارسلها على جروب الفاجومي كانت تسمى معاني الغربة و لتأثري بهذة القصيدة ارسلت رد عليها فارسل طارق رد و عجبني الحوار الشعري اقلكوا تعالوا نشوف القصيدة و الردود
معانى الغربة
يا كمنجاتى قسم .. سلطن..
إطلع وزا .. وإنزل بطا ..
واظبط اوتار تعزف لينا .. ويا كلامى ..
احلى اغانى ..
ترجع بينا لاحلى زمان ..
شارع هادى ..وكله حبايب ..
والدى وجارنا .. اللى قصادنا .. الناحية التانية ..
كانوا ف حكمنا زى قرايب ..
انا وهشام وجارتنا الغالية ..
اول اولاد جريوا ف بيتنا ..
قبل ما حتى يجينا اخوات ..
كنا تلاته .. بنمشى التاتا ..
كانت فرحة لما مشيت ..
عديت ايام فجاة لقيت ..
كتروا اخواتنا ف غمضة عين ..
وبقينا صحبة ورد تزين سطح البيت ..
كنا نذاكر وسط حيطانا .. ويا المطرة ..
وساعة الحر بنملى السطح زعيق و خناق ..
بلي.. ونحلة ..واولى.. و ليدو ..
كل الايام زى اخواتها ..
واللى بنعمله فيها نعيده ..
نطلع نجرى ويا السلم ..
ننزل ننهج م التعبان ..
عينا تفتح سوا ع الدنيا ..
زينة بتملى الشارع فرحة ..
رمضان جاى .. وحلوا يا حلوا ..
وفانوس قدنا كده من طولنا ..
نتملى فرحة لما ينور م العصرية ..
نعرف ان الكحك ابو سكر ...
هوا اوانه الايام ديا ..
فجاه كبرنا ..
واصبح بينا حواجز ياما ..
عيب و زعيق .. وعتاب و ملامة ..
لما بنطلب .. نطلع نلعب ..
انتوا كبرتوا .. وبينكم بنت ..
عيب مايصحش ..
والنبى نطلع مرة يا طنط ..
اسمع شخطة امى تقول ..
اجرى إتفضل .. ادخل اوضتك ..
اقفل بابى .. واجرى قوام احضن شباكى ..
يمكن تيجى قصادى و اشوفها ..
والله ما فاهم ..
ايه اتغير بس ما بينا ..
طولنا شوية؟ .. طب ايه يعنى ؟ ..
حتى جارتنا صبحت تخجل لما باشوفها ..
او اقابلها ف يوم ع السلم ..
كلمة ورد ..
والله ده باين الموضوع صح .. وجد الجد ..
حتى ف يوم لو قاعده قصادى ..
اسرق نظرة .. مع اغنية سوا بنسمعها ..
كانه سؤال ..
والمح رد ف نينى عنيها ..
خجلان حاير ..
مرة تبص يمين لمامتها ..
ورمة تبص لعمو شمال ..
خايفة تقرب ..
وده كان اول مرة اتغرب ..
درس وخدته قبل ما احصل سن الرشد ..
وبدات افهم اول حصة قالتها الدنيا ..
واول حرف ..
قبل ماندرس جبر .. وخط ..
ونحو .. وصرف ..
ان الغربة اكيد جايالك ..
مهما هتجرى .. او راح تهرب ..
لازم جوا القلب هترشق ..
وتجرحنا .. تغصب .. تضرب ..
شوف الغربة ..
غربة حي .. وغربة بيت بتصاحبه سنينك ..
لما بتكبر .. تنقل غيره ..
وتعيش غربة عفشه .. حيطانه ..
ودقة بابك ..
غربة مدرسة تقفل بابها .. لما بتكبر ..
وتسيب فيها اعز احبابك ..
غربة اخ .. واخت تسيبك ..
لما يجيلها النص التانى ..
تفضى عليك الدنيا لوحدك ..
مع ان انت ف نفس البيت ..
غربة نفسك ..
اه لو جيت .. بصيت ف مرايتك ..
ولقيت غربة نفسك فيها ..
غربة صورتك وانت بتكبر ..
غربة صوتك لما بيخشن ..
غربة شعرك لما بيقلع ضلمة ليله ..
تقدر تفهم بعد كلامى ..
معنى الغربة اكيد بقى واضح ..
يعنى الغربة ماهياش غربة اهل وبيت ..
ولا هياش غربة اوطان .. ولازرع وغيط ..
صاحب نفسك ويا مكانك .. عيش متصالح ..
اخلق ليك ف الدنيا مطارح ..
دايما خليك وسط الناس ..
عيش وياهم .. غنى غناهم ..
قد ماتقدر عيش جواهم ..
تقدر تدفن غربة نفسك ..
جوا ف قلبك ..
وتعيش ويا الدنيا كانك ليها حبيب ..
بعد ماعشت العمر بحاله ..
فاكر انك فيها غريب ..
طارق المملوك
16/4/2006

----------------
فكان الرد
----------------

قول كمان و سمعني
متعني بشعرك متعني
و لو انك قلبت علية
احساس كتير بيوجعني

راح اجيلك على طول من الباب
لا هنافق و لا اكون كداب
شعرك مش بس جميل
دة زهلني بحب و اعجاب

و هقلك كلمة يا مملوك
بس احلف و رحمة ابوك
في دنيا الشعر الواسعة
تحضني و تعملني اخوك

شمس الزناتي

----------------
فكان الرد
------------------
يا ريت يطاوعنى يوم قلمى
ويكتب ويا احلامى .. سطور المى
واحكى كل ما بيا ..
واكتب كل ما فيا ..
كلام موزون ..
و بيت مسكون .. من الكلمات ..
وتيجى يا صاحبي تسكن فيه ..
تونسنى ..
تانسنى ..
و نتكلم عن المقسوم ..
ونحلم نركب الالحان و نتعلم .
نحب الكون .. ونتكلم ..
يا صاحبي تعالى شاركنى ..
ده بيت من فاضى لا عمره ف يوم يساع قلبى ..
ولا عمرى يهون حبي ..
على صاحبى ..
ده شمس الكون .. دى بعيونة ..
وزناتى ف يوم الفرح يفردلى ..
زينات الحب و المعنى

تحياتى لك اخى الحبيب

طارق المملوك
----------------
فكان الرد
------------------
ان قلمك ما طاوعك يوم
راح تطلع في السما نجوم
و تقلك اكتب من تاني
دة شعرك نجم النجوم

هتكتب كل ما بيك
و افراحك تكون ليك
و احزانك تسيبهالي
اشيلها عنك اعافيك

هنتكلم عن المقسوم
هطلع كل المكتوم
هنتكلم على بلادي
هنتكلم في ضوء معدوم

تعلمني اقول للكون انا بحبك
تعلمني اقول للدنيا فين ودك
و انشف عيون تعبت من الدمعة
هنتعلم نقول للفرح انا عايزك

دة مملوك ملك مجموعته باشعاره
سجنهم في حبة و قلمه هو اسوارة
و ان جة في يوم و قال افراج
يطالبوه بمدة كمان يعلمنا فيها افكاره

شمس الزناتي

نفسي بجد

كل يوم وأنا ماشي بسمع حواديت وأشوف ناس ماشيين ...... ألاقي واحد سارح في ملكوت الله ...... وألاقي واحد تاني بيكلم نفسه ......... كنت ساعتها بقول الله يكون في عون الناس ........ دي ناس تعبانة وبتجري على ولادها ولقمة العيش ........بس لقيت العكس ولقيت الخيبة كبيرة .......... لقيت بقى يا أخواتي شاب وماشي مع مزة حلوة قال إيه مرتبطين وبيحبوا بعض

قلت ماشي .......... ولقيت كمان واحد تاني كل يوم عايش في وادي يوم يقولوا يلا ندوخ وماله ندوخ وخلاص ........ ويوم يقولوا يلا نلعب يقولك وماله يلا نلعب .......... ولحد امتى حتفضل كل يوم في وادي ............. ولا كمان الضريبة تلاقيهم يجروا على كل جوان وفي أي حتة تلاقي إدمان يقولوا يلا نقضيها إدمان

ولا البنت التانية الدلوعة ماشية على حل شعرها كل يوم مع شاب في راحة ومتعرفش نسمي ده إيه ؟؟؟؟؟؟؟؟ أما بقى على الناحية التانية تلاقي شباب طافحين الكوتة وكله بيجري على لقمة عيشه ........ تقولوا نقضيها يقولك هي ناقصة تقضية يا عم شوفلك أي مصلحة دي ظروفنا صعبة وأنت مش داري بحالنا ......... ولا إخواننا أصحاب المؤهلات العليا اللي أنا منهم ياسلام علينا الشغل مرمي على الصفين والوظائف بالكيلو بس تقول إيه إيه شبابنا شباب فقري عايز يبقى وكيل وزارة في غمضة عين ........ وأمانة عليكم ياناس حد يكلم شبابنا يقنعه بأشغالنا اللي مالية بلدنا .......... ولا حد يكلم وزيرنا يقول مطلوب وكلاء وزارة ومديرين مش بس كده كمان بمرتب 100 ألف جنيه في الشهر ............. ما هو برده الفلوس مالية بلدنا ومش عارفين نوديها فين ............. بس سؤالي يا ناس الي سارح في ملكوت الله سارح في إيه .......... واللي بيكلم نفسه بيكلم نفسه في إيه .............. واللي مقضيها مقضيها ليه .......... واللي بيشرب بيشرب ليه .......... واللي عايش في وادي تاني عايش في إيه ............... عموماً الإجابة مش عندي لأني بصراحة مش لاقي إجابة ؟؟؟؟؟؟؟ عارفين ليه ............... لأني أنا مش معاهم