أخبار انا مش معاهم : نوشة وشمس يهنئون كل الشعب المصري والمدونين خاصة بقرب حلول عيد الفطر المبارك ويارب يكون العيد كله فرحة وسعادة للناس كلها

Saturday, May 3, 2008

كل سنة و انت طيب يا ريس

بسم الله الرحمن الرحيم
و ادع الي سبيل ربك بالحكمة والموعظة الحسنة
صدق الله العظيم
وحشني جدا اني اكتب في مدونة " انا مش معاهم " خاصة انها المدونة الخاصة بي انا و صديقى نوشة طبعا انا مش جاي النهاردة عشان احكيلكوا عني انا و صديقي لكن انا بكتب النهاردة لسبب اخر و هو ان غدا بأذن الله هيكون 4 /5/2008 اي الرابع من مايو
و طبعا دة بيفكرنا بحدث مهم ، حد هيقلي الاضراب اقله لا يا فندم و انما عيد ميلاد الرئيس محمد حسني مبارك
و انا من مكاني هذا من خلف الكي بورد احب اقله كل سنة يا ريس
و قبل ما حد يقول ان انا قلبت منافق احب اقلهم تعالوا نفتح عنينا
مبدئيا منذ ايام قليلة خرج علينا سيادة الرئيس بزيادة في المرتبات 30% و سواء اقر الزيادة تحت ضغط شعبي او ان احنا صعبنا علية فقال يحسن علينا فهو تصرف اعجبني و بما انني من افراد هذا الشعب فمن حقي ان اقدم شكري على هذا التصرف
ثانيا غدا يكون الريس اتم العقد الثمانين من عمره يعني 80 عاما في خدمه هذا البلد لو اعتبرنا ان من الثمانين سنه دول قام الرئيس بخدمه البلد على حق يقال قيمة 10 سنوات و هي سنوات الحرب و ما بعدها يبقى من حق اي مصري على خدمه العشر سنوات دول ان يعتبره من ابطال حرب اكتوبر و يقدم له التهنئة
اظن كدة انا نفيت عن قلمي صفه النفاق اللي كان ممكن ناس كتير تتهمنا بيها
نأتي بقى للنقطة الاهم
ما الشئ المتوقع حدوثه يوم 4 مايو
طبعا كلكوا عارفين اضراب 4مايو الشهير اللي الناس كلها بتدعوله على الفيس بوك
مبدئيا و باعلى صوت
انا مش معاهم
و هذا لاسباب مبدئيا حضراتكوا عرفتوا ما حدث في المحلة الاضراب الماضي و كان شئ لا يليق باي شعب متحضر
ثانيا : انا كنت اساسا ضد الاضراب الماضي يبقى من الطبيعي ان انا ضد هذا الاضراب ايضا
ثالثا و الاخيرة : ان الاخوان قرروا المشاركة في اضراب 4 مايو و دة سبب وجية يجعلني لا اشارك في هذا الاضراب
و في كمان ملحوظة مهمه مش انا لوحدي اللي قررت عدم المشاركة كتير معايا قالوها منهم
يعني متهيئلي ان دعاه الاضراب يفكروا من تاني و يفكروا صح قبل ما يعملوا اي حاجة
و متهيئلي كمان انا كاتب اية كريمة فوق بادئ بيها البوست ياريت نراجعها تاني مع بعض
و بقولها تاني للريس
كل عام و انت بخير

25 comments:

ShahrZad said...

برافو عليك يا شمس
انا كمان بقول كل سنه وانت طيب يا ريس
وكمان انا معاك وانا مش معاهم فى الاضراب الى بيقوله عليه ده ومكنتش مع الاضراب الى فات وميرسي انك ادتنى الفرصه اقول ده
جزاك الله خيرا وربنا يوفقك

طرقعات فجائية said...

اخى الفاضل وصديقى العزيز شمس

اتمنى معك كما تتمنى ان يعيدوا التفكير فى موضوع الاضراب فكفى ماحدث فى المحلة من مهازل واعتقد ان اسراء لو عرفت قبل بدء دعوتها للاضراب ان هذا سيحدث فأنا متأكد انها كانت ستفكر الف مرة واشكر لك تدوينتك ورأيك الحر
ولك تحياتى
اخوك طارق الجيزاوى
مدونة طرقعات فجائية - مكتوب

Dr-Ahmed said...

فعلا يشمس كل عام وانت طيب يريس...

اشكرك علي زياده المرتبات بنسنه 30 في الميه غير الزياده السنويه اللي بتكون في شهر سبعه..

وانا ايضا لا انضم الي اضراب 4 مايو اذا كان بنفس طريق الاضراب اللي فات لاني ام انضم اليه..لانه كان تدمير وليس اضراب سلمي...

وكل 80 سنه وانت بخير

Anonymous said...

بصراحة زعلتوني
يعني ايه احنا مش معاهم وليه ما نضربش؟؟؟
هل عشان ضحك علينا بالـ30%
اللي كعادة وعوده مش هتتحقق؟؟؟
ولا عشان الإخوان مشاركين في الإضراب
انا عن نفسي لو الكفار بتوع مكة رجعوا تاني وقالوا هنعمل اضراب هكون معاهم

انتوا بتفكروني بواحد صاحبي كان فرحان جداً لما حسني شال الجمارك عن الجبنة والمكرونة والرز.
وقتها سألته وانت يا ابن الهابلة من امتى كلت جبنة مستوردة ولا مكرونة مستوردة؟؟

حسني ضحك عليك
مبروك

الفاتح اليعقوبي said...

السلام عليكم
ازيك ياعم شمس ربنا يكرمك كل سنة مصر طيبة عامة خيييييييير
وصدق الله عز وجل عندما قال في كتابه :(وادعو الي سبيل ربك بالحكمة والموعظة الحسنة)
فماياتي باللين لاياتي بالعنف والقسوة

ولكن دعني اختلف معك قليلا فافضل مافي الاضراب 6ابريل او غيره هو كسر حالة الجمود الشعبي او الجماهيري في مصر وهو اهم بكثير من كسر حالة الجمود السياسي

وقد لااجد مبررا منطقيا لرفضك اضراب 4مايو اما بسبب حالة التخريب والتكسير التي افتعلها الامن وقد صورت مشاهد كثيرة لرجال الامن يكسرون في عرباتهم ولا استبعد ان يكونوا هم من كسر ودغدغ في المحلات حتي لايقال بعد ذلك اضراب او حركة شعبية عشان لما حد يقول اضراب بعد كده يقولوا اي الحكومة ايه نسيتوا اللي حصل في اضراب 6ابريل


اما سببك الثالث بعدم المشاركة في الاضراب القادم بسبب ان الاخوان هايشاركوا فيه
لن اسالك عن الاسباب ولكن دعني اقول لك اذا كنت تشارك من اجل عز بلادك فلن يهمك وقتها اخوان او غيرهم اما اذا كنت شتارك من اجل الاخوان او عندا فيهم فلاتشارك و
ملحوظة صغيرة
الاضراب القادم هو دعوة الي التزام البيت في هذا اليوم وليس النزول الي الشوارع


اما 30%هذه فهذه نكتة ياسيدي الفاضل ويفترض انك رجل مثقف وتفقه هذا
انا سمعت خطاب الريس وقال بالظبط كده (انا قلت للحكومة فين علاوة العمال قالوا هاتبقي 15%ياريس قلت لا 30%قالوا ياريس 20%كفاية مفيش تمويل للعلاوة قلت لهم 30%واتصرفوا شوفوا اي تمويل من اي حتة انتم ومجلس الشعب)0
مبتضحكش ليه
ياسيدي رئيسنا يعالج ظواهر واعراض ويترك الامراض كما هي حتي تقضي علي هذه البلاد من اين سيتم تمويل العلاوة الجديدة ؟؟؟؟؟؟؟؟؟؟؟؟؟؟؟
ده سؤال برئ بيطرح نفسه علي 80مليون مواطن مصري
نشكر مشاعره وفعله ولكن مش عايزين نكحلها نقوم نعميها

وحبيبي ربنا يكرمك ويجازيك خير واتمني انك متزعلش من اي كلمة ممكن تكون ضايقتك في تعليقي
والسلام

Unknown said...

من جهه الاضراب انا مش مقتنع بيه و مش هضرب
بس لو هنقوله كل سنه و انت طيب عشان الحرب الاولى منه الشهداء و المصابين اللي رموا نفسهم في النار اما هو فأي شخص مكانه هيعمل اللي عمله و زياده و كفايه اللي عمله في البلد

مصعب رجب said...

السلام عليكم ورحمة الله وبركاته :
أولا : أنا من الإخوان المسلمين ولكن رأيي لا يعبر إلا عني وحدي .

ثانيا : الآية : ادع إلى سبيل ربك بالحكمة والموعظة الحسنة وجادلهم بالتي هي أحسن

الآية ليس في أولها حرف الواو الذي كتبته
ومن هذه الآية فسوف أجادلك ( أناقشك ) بالتي هي أحسن


ثالثا : بالنسبة لمشاركة الإخوان :
هناك احتمالين :
الأول : أن قرار الإخوان بعدم المشاركة في إضراب أبريل كان خطأ وبالتالي لا نلومهم الآن لأنهم يصححون هذا الخطأ
والثاني : أن القرار الأول كان صوابا والثاني هو الخظأ ولكن لم يتحدث أحد عن ذلك وفي النهاية يبقى من حق الإخوان أن يقرروا الطريق الذي يسيرون فيه ويتحملوا نتيجة قراراتهم وليس من حق أحد ان ينصب المشانق للآخرين لمجرد انهم يخالفونه في الرأي

الديموقراطية هي أن تعرض كل الآراء وتقبل بما أقرته الأغلبية

جزاكم الله خيرا
والسلام عليكم ورحمة الله وبركاته

حسن مدني said...

عزيزي شمس

عندي نقطتين
الأولى/ من حقك أكيد أن تهنئ الرئيس بعيد ميلاده، وهو ليس عدو لنا، هو رئيس دولة، نتفق معه أو نختلف. لكنه يظل في النهاية رئيس للدولة، ويظل مواطن. وقبل كل شيء يظل إنسان..
الثانية/ لا أظن إن انضمام الإخوان إلى الإضراب يمثل سبب كافي لأن تشارك أو تمتنع عن المشاركة.. لأن امتناعك عن المشاركة لمجرد مشاركة الإخوان، هو معارضة للإخوان من أجل المعارضة.. وهذا ليس استقلال فكري أو سياسي..
والحقيقة إنه أحسن ما قرأت عن الإضراب هو الموقف الأولي لنوارة نجم.. قالت أنا مش مقتنعة لكن مادام الناس اتفقوا أنا معاهم..
أنا مع قومي.. هو ده الالتزام بالجماعة في العمل..
طبعا لك مطلق الحرية أن تشارك في الإضراب أو تمتنع عن المشاركة. أنا اعتراضي على السبب الذي ذكرته..

تحياتي

يورو said...

انا مش هعترض على كلامك يا شمس
بس هقول ربنا يستر
بعد القرار الى اخده الرئيس بزيادة المرتبات للموظفين
وباقى الناس مش مهم تعرف تعيش
بعدها قانون الضرايب على الممتلكات م يطلعش
ويستر كمان وم يخترعوش قوانين
يعنى ممكن فى يوم نصى نلاقى قانون ضرايب على الى يمشى على الرصيف فى الشارع
وقانون ضرايبب على الى يتنفس الهوا
يعنى مش زى م بيحصل دايما من الحكومه تدى باليمين وتاخد بالشمال

تحياتى ليك

ابن رشد said...

muslima
ويس جدا ان احنا مع بعض و بدانا نتفق

ابن رشد said...

NO PROBLEM
استاذي الغالي الاستاذ طارق
رائع جدا ان اجد من يؤيد رايي و قد توقعت هجوم عاصف و اشكر لك زيارتك

ابن رشد said...

د / احمد فارما
الله ينور عليك من حقي الاعتراض و لكن في اطار سلمي

ابن رشد said...

انوميس
على العموم يا سيدي احنا هبل و بنفرح بال30 % احسن ما نكسر و ندمر

ابن رشد said...

الفاتح اليعقوبي
طب اهو الاضراب فشل اية الحل بقى

ابن رشد said...

Mohamed_sobhy84
يبقى برضة يستحق تقدير و لا اية

ابن رشد said...

ابو اسامة
برضة حضرتك سبت الموضوع الاساسي هل فكرة الاضراب نفسها ناجحة او لا و اتكلمت عن الاخوان و دة شئ طبيعي عشان انت اخواني

ابن رشد said...

حسن مدني
الاولي انا متفق معاك فيها
التانية بقى مش متفق ليه
لان انا وجهه نظري ان اي حاجة فيها الاخوان بتفشل

ابن رشد said...

يوورو
لا ما انا عرفت انهم هيغلوا البنزين و الجاز

rona said...

كل سنه والريس طيب
والسنه الجايه البلد تكون احسن
الريس مش محتاج اعتراف مننا بإنه من ابطال الحرب لانه اكيد
بس الناس تعبانه بجد وحتى العلاوه يتمنو يرجعوها والاسعار تنزل
انما الاضراب هيعمل ايه
البلد عيزه معجزه

Unknown said...

معقوله !!! شمس كاتب كل الكلام الكبير ده ...خير ايه الى جرى للدنيا ؟ يمكن خاف
على نفسه يحصله زى اسراء ؟ لا اظن فهو مش جبان وراجل قد كلمته ..نفسى اعرف ايه الى خلاك تتغير كدة فى انتظارك لمعرفة ما حدث مع العلم انا زعلان منك للمرة الثانية وتعليقى ده له معنيين عام وخاص

Unknown said...

اخى الفاضل

شمس اسمح لى ان ارد على اخينا الفاضل
حسن مدنى
-------------
بداية هو قال فى تعليقه
لأن امتناعك عن المشاركة لمجرد مشاركة الإخوان، هو معارضة للإخوان من أجل المعارضة.. وهذا ليس استقلال فكري أو سياسي..
والحقيقة إنه أحسن ما قرأت عن الإضراب هو الموقف الأولي لنوارة نجم.. قالت أنا مش مقتنعة لكن مادام الناس اتفقوا أنا معاهم..
أنا مع قومي.. هو ده الالتزام بالجماعة في العمل..
------------------------------

ولماذا لم يشارك الاخوان فى الاضراب السابق الذى اتفق عليه الجميع ؟
بس خلاص

ابن رشد said...

rona
انا عارف ان الاسعار زادت و مش لاقي سبب لكدة الي الان

ابن رشد said...

حسن توفيق
استاذنا
اولا انا مقدر على زعلك
ثانيا
انا مش خايف و لا جبان بس انا بحاول افهم

ابن رشد said...

حسن توفيق
تطابق ردي مع ردك

كلام على بلاطة said...

فكرتنى بالنكتة
اللى بتقول انت معانا ولا مع الناس التانيين
قاله انا معاكم
ردوا وقالوا لكن احنا الناس التانيين
وبكده تبقى غلطت يا معلم
وحق عليك العقاب
تحياتى

GOOGLE