الحمد لله و الشكر لله انا ضامن ان كل من شاف اعلان الحزب الوطني عن المؤتمر المنيل بتاعه
مش بيقرا البوست دة عشان اي حد شاف الاعلان زمانه بيتعالج من الضغط من السكر
بس انا بصراحة مخدش الموضوع على اعصابي
انا لقيتهم بيقولوا في زراعة جميلة و صناعة متطورة و فرص عمل كتير و شباب زي الفل
اه و الله و البدل و الكرفتات عليها عسل
و لا الكباري المنورة و الميادين النظيفة و المصانع المتطورة اللي شغاله
انا طبعا شفت الاعلان فرحت جدا بس قلت انا اكيد مشغل قناه مش مصرية
اكيد دة مش في مصر
حاولت اتأكد لقيت مكتوب عليها المصرية الاولي قلت بس يبقى الدش عندي بايظ
اصل كل الاحتمالات مفتوحة إلا ان اللي بشوفه دة يبقى في مصر
امال العواطلية اصحابي مجوش في الاعلان لية
و الاتوبيس العطلان اللي بركبه كل يوم مجاش لية
و الوسطة اللي بدور عليها عشان اشتغل و مش لقيها مجتش لية
قدام كل دة مجاش يبقى الاعلان دة مش في مصر
على راي عم نجم
"يبقى البتاع في البتاع و الناس تقول دة زهول"
"و ان حد قال دة البتاع يقلوله مش معقول "
و الله عم نجم مكدبش يلا يا جدع دي بلد بتاع صحيح ما علينا
اوصيكم خيرا بانفسكم و متشفوش الاعلان دة
اللي ماشي بالشقلوب يعني انت تسمعه في اوله صح تيجي عند نصه و تقلب ما تستناش
و احب اهدي لجميع اعضاء الحزب الوطني
اغنية
و يا عيني عليكي يا مصر
--------------------
-----------------
24 comments:
اهو شكلنا كدة ياشمس
هنقضي حياتنا كلها
نتفرج علي اعلانات
ومن اعلان لاعلان
ياقلب لاتحزن
حسبي الله ونعمة الوكيل
لا يا شموس انت اكيد في مصر لانه كل حاجه تمام والعيب فينا احنا يا اخي يعني بدل الاتوبيس نركب تاكسي ولا نمشي احسن و بدل ماانت عاطل سافر ايطاليا واغرق وبدل ماانت عاوز واسطه ماتفتح مخك وتدفع وانت تلاقي الواسطه عندك والزباله فيها ايه لو نضفناها احنا او كلناها حتى بلاش تقلب علينا المواجع اما احنا امرنا غريب يا اخي احنا عاوزين كل حاجه يعني لازم يكون عندنا دم ومنستناش كل حاجه من الحكومه الغلبانه
حلوة قوى القفله ياشمس
ولا بلاش -القفله - لتتكرهب
حلوة - الخاتمه - ايها الفتى
كيف حال اخواننا فى اورشليم
السلام عليكم
سعيدة بمرورى عندك
بس انا شايفاك متشائم شوية...
هو انت مش شايف الشغل مرطرط وبيوزعوة مع شهادة التخرج؟؟
انت مش شايف ان زمن الوسايط خلص من بدرى وولى وانتهى؟؟؟
انت مش واخد بالك من كم الشقق اللى بتوزع مع بطاقات التموين..لو وجدت؟؟؟
بلاش افترى بقى
تحياتى
ازيك ياشمس ايه بقى البوست اللى فى نبرة التشائم دى مسيرها تتحل والاحلام تصبح حقيقه ياسيدى يعنى اللى اشتغلوا اخدوا ايه طلعوا عيانين وتعبانين والفلوس اللى اخدوها من الحكومه بيصرفوها عالادويه
لا لا ازاي يا بني..يبقى انت أكيد في مصر فعلا..مصر بتاعته..مصر بتاعتنا احنا حاجة تانية..أصل احنا دولة تدعم اللامركزية...يعني ميبقاش فيه مصر واحدة ..أكتر من مصر..شكلك مش بتركز في الإعلانات يا شمس0
انا مش بعرف الحزب الوطني يا شمس
بس بعرف الواقع اللي يحاكي كل مكان
يا شمس انت زعلان ليه احنا نكزب الكزبة ونصدقها على أمل انها تبقى حقيقة
مش ممكن يجي يوم تبقى في زراعة جميلة و صناعة متطورة و فرص عمل كتير و شباب زي الفل
اكيييييييد رح يتحقق
ولا يغير الله ما بقوم حتى يغيرو ما بأنفسهم
دمت بخير
أم المييس
دي مصر النادي النووي
متعرف يا شمس هما هايقفلو البلاعات و يشوفوا حل لقش الرز قبل النووي ولا بعده
انت بس الي مش عايش في مصر البلد بتتغسل بشامبو كل يوم الصبح و الشعب بيفطر كرواسون و نسكافيه
مصر بتتقدم بينا
مين بينا دول انا مش عارفه هما الناس الي علي القهوه و لا الي بياخد 200 جنيه في الشهر و لا مين بينا دول
لأ بجد صدق انك في مصر .. مهو لما تلاقي اعلان كدة و نتايج او حقائق او وقائع كدة اعرف انك في قلب ام مصر .. يلا
بنت الاسلام
و الله على رايك حزبي الله و نعم الوكيل
عالم فاضية و الله
hekaytna
قول من الاخر البلد عايزة تخلص مني و من لماضتي
هيثم الغيتاوى
اخوانا في اورشليم متنيلين على عينهم
sa7arkash
انا شايف ان الشعب كله تحول لحالة هستيرية
ريهام
و النبي انا بيعجبني اوي روح التفائل اللي فيكي يا ريري
احمد المصري
هههههههههههههههه
بجد يا احمد انت جبت فكرة جامدة اوي في اتنين مصر
مجموعة حياة
و الله يا ميساء انا متعلمتش اعيش الوهم الواقع اهم
emy
انا عارف انك مخنوقة زي بالظبط و يمكن اكتر و الله انا حاسس بيكي
هشام رمضان
واضح انك جبت الحل المنطقى
نوشه
عيب عليك يا راجل
ازاى تقول كده
دهانت لما تشوف و تسمع الكلام ده لازم تتاكد انك انت فى مصر
البلد الوحيده اللى حكومتها بتتضحك ع نفسها قبل ما بتتضحك ع الشعب بلد البكذب و النفاق
شمس
كل كلمة فى الاعلان مظبوطة
بس انت اللى كنت قاعد وراء التليفزيون ولا ماكنتش لابس النظارة البمبى بتاعة سعاد حسنى
الاسطى حسنى اجدع سواق فى الجمهورية بس احنا اللى مابنعرفش نركب
عادل نجم
في مثل حلو بيقول اذا كان المتكلم اهبل فالمستمع عاقل
ولو كان الناس بتوع الحزن الواطي دول بيقولوا ان احنا بنعيش حياه كريمة وامينة وعزيزة ورشيدة
يبقى انت اكيد اكيد مش في مصر في سوق الخضار
وفعلا بلادنا بتتقدم بينا احنا مش بيهم هما
صاحب مدونة ميخا
بص يا شمس طول ما أحنا بالمنظر الخانع ده
يبقى أحنا فعلا مساطيل و بنطوح
مدونه رائعه حقا
بس انا فى مصر
الغلطة غلطتك انت يا شمس
ازاي مش واخد بالك من الرفاهية والنعيم ... بجد ظالمهم يا راجل ..
بذمتك يا راجل مشفتش الطفل في ايديه حفيده ... هتنكر ...
اصل دي من علامات الدنيا السبع مش موجوده الا في مصر ...
خالص تحياتي يا شمي
دمت بكل ود...
Post a Comment