انا مش معاهم: قبح الحكومة في مواجهة البطالة والشباب الضائع

Friday, October 26, 2007

قبح الحكومة في مواجهة البطالة والشباب الضائع

الحكومة المصرية بتاعتنا الجميلة اللي مش حارمة أي حد من أي حاجة أبداً
لقت عندها مشكلة بطالة كبيرة جداً جداً فوق الوصف والأعداد بالملايين
والغلابة كلهم من أصحاب المؤهلات العليا والشهادات المتقدمة
منهم اللي قاعد على القهوة
ومنهم اللي اتجه للمخدرات والإجرام
ومنهم اللي مات جواه أي حلم وأي أمل في بكرة
ومنهم اللي لسه جواه بصيص أمل وتفائل
وغيرهم كتير جداً بس مش عايز أخوض في حاجات كتير
المهم
الحكومة بتاعتنا بقى فكرت في حل للناس دي تشغلهم إزاي
أو بمعنى أصح
تقفل بقهم عن الكلام والوظائف والأشغال نهائياً
وتبقى عملت اللي عليها وزيادة شوية
ففكرت في فكرة شيطانية عبقرية
وبيها عملت عذر أقبح من ذنب
وممكن يكون فيه ناس كتير شافت الإعلان بتاع الفكرة دي
وهي إنك تتصل على رقم تليفون 16456
وتديهم كل بياناتك مهاراتك
وهما يردوا عليك في أسرع وقت بالشغل و الوظيفة الموجودة
وهيدلوك على المكان المناسب ليك
بس
عارفين يا جماعة الوظائف دي إيه ؟؟؟؟
الوظائف دي عبارة عن
عمال في مصانع
تشتغل على ماكينة أو تنقل شوية حاجات أو حتى شيال
وكمان عمال في المقاولات مع مهندسين
يعني بالبلدي كده تشتغل فواعلي بالأجرة
وتشيل رمل وزلط على كتافك
وممكن ربنا يكرمك وتقعد على ماكينة خلط الأسمنت
بس مش هتبقى مليونير ووزير زي سعد الدالي يعني

وكمان إيه اللي هيكون كويس في شغله وعلى مستوى عالي

هيسفروه بلاد برة يشتغل هناك

علشان تبقى مرمطة من كله غربة ... وفقر

وموت يا حمار بقى ... وأبقى قابلني لو عرفت ترجع تاني

ولا حتى تقدر تعيش بكرمتك وبعزتك هناك
وغيرها من الأمثلة دي كتير بس أنا مش فاكرها كلها
والنبي
أنا راضي ذمة أي حد في الدنيا دي
الكلام ده ينفع مين ؟؟؟
ولا حتى يرضي مين ؟؟؟
طبعاً وكالمعتاد
هيطلع واحد يقلك وإيه يعني هو مش شغل وخلاص
والتاني هيطلع يقولك ده أقرع ونزهي سيبك منه
والتالت هيطلع يقولك إنت عايز تشتغل وزير
والرابع بقى هيقول أي حاجة والسلام
بس اللي أنا عايز أقوله
إن الناس دي اللي هتخلي فكرة الحكومة الشيطانية تنجح نجاح ساحق
إنها تقول إننا عملنا اللي علينا من ناحية البطالة
ووفرنا ليهم وظائف وأشغال والناس اللي اتقدمت اشتغلت والحمد لله
وعملنا اللي علينا علينا والباقي على الله

بعد لما اتعلمنا وتعبنا و أهالينا سهرت وصرفت علينا دم قلبها
يبقى أخرتها إنك تلاقي نفسك في الوضع ده وفي المستوى ده
وغيرك بقى من أصحاب الوسائط والفلوس والمصالح
غارقنين في الوظائف والأشغال ولا في دماغهم أي حاجة ولا حتى أي مشاكل
وممكن يكون منهم كمان أقل منك ومني في علمك وتفكيرك وجهدك
يبقى الواحد كان خدها من قصيرها وبلاها تعليم وشهادات وزفت
وراح اتعلم أي صنعة أو أي بلة أزرق وعاش وخلاص
بس هتقول إيه بقى
هي دي بلدنا مصر وهي دي حكومتنا

معلش بقى يا جماعة أنا طولت عليكم
بس الموضوع ده حارق دمي أوي

تحياتي ليكم

NOSHA

14 comments:

بنت الاسلام said...: موضوع الرقم ده يوم ماشوفته استفزني قوي برده وكنت هكتب فيه بوست بس يالا انت سبقتني حلال عليك

طب البنات هيشغلوهم ايه

؟؟؟؟؟؟؟

ربنا يرحمنا برحمته الواسعة

للاسف هو ده الحال

وهي دي

الحكومة المصرية

تحياتي

بنت الاسلام; October 26, 2007 at 2:19 AM
محمد مارو said...: نوشه
انا اصلا بقول التعليم فى مصر المفروض يكون تعليم فنى مش عالى احنا دوله ناميه مش عوزين موظفين بس عوزين حرفيين يبئه نعلمهم المهنه و الصنعه افضل; October 26, 2007 at 2:52 AM
ابن رشد said...: معلش يا نوشة استحمل ربنا بلينا بحكومة غبية نعمل اية; October 26, 2007 at 5:14 PM
simple girl.. ..simple dream said...: انا طول عمرى بقول ان فلوس تعليمنا دى استثمار فاشل
لانها بلا عائد

من اصول التجارة انك لما تحط قرش يرجعلك جنيه
لكن احنا الوفات تعليمنا دى هترجع ايه؟؟؟

هترجع قرف ووجع قلب طبعا; October 27, 2007 at 12:51 AM
الحمقاء المضلله innominate x said...: فعلا الإعلان ده حرق دمي في رمضان و انا كنت عارفه انهم ناوين يشغلوهم عمال في مصانع بايننننننننننننن جدا من الإعلان.......و نظام ان ممكن القطر يفوتك و انت قاعد على القهوه ...........طب اما هو اخرتها كده ما كان من الأولللللللللللللللل يدخلوا مدارس صنايع الخ الخ لزمته ايههه يدخولوا الجامعه حاجه مستفزززززه; October 27, 2007 at 1:06 PM
Anonymous said...: انا كنت فاكره الحكومه النظيفه عامله الموضوع دع للشاهادات المتوسطه و الصنايع و كده
ماينفعش واحد خريج طب او صيدله او السن او هندسه ولا سياسه و اقتصاد اطلب منه يشتغل كده
صحيح الشغل مش عيب بس يعني الشغل المناسب ولا هو لوي دراع يا شغل بهدله و قلة قيمه يا تقعد في البيت تقشر جزر; October 27, 2007 at 7:42 PM
nosha said...: بطة
والله الموضوع حرق دمي جداً مش استفزني وبس وهنقول إيه بقى ربنا معانا ويصبرنا; October 28, 2007 at 5:11 PM
nosha said...: مارو
لو التعليم في مصر أصبح تعليم فني يبقى مش هيكون عندنا أي تقدم أو أي تكنولوجيا أو حتى أي نوع من أنواع التفكير والإبداع; October 28, 2007 at 5:12 PM
nosha said...: شمس
والله أنا صابر ومستحمل أهو هنعمل إيه يعني ودي مش حكومة غبية ولكن حكومة شوية حرامية وشوية شياطين; October 28, 2007 at 5:13 PM
nosha said...: simple girl.. ..simple dream
نورتي المدونة بزيارتك
وشكراً على تعليقك الجميل; October 28, 2007 at 5:15 PM
nosha said...: الحمقاء المضللة
نورتي المدونة وأشكرك على زيارتك ومستني زياراتك الجاية
الإعلان ده حارق دم ناس كتير جداً وأنا بقول إن دي فكرة شيطانية من الحكومة علشان يهربوا من مشكلة البطالة يبقوا هما عملوا اللي عليهم والشباب اللي مقصرين وقاعدين من غير شغل
ربنا يصبرنا يارب; October 28, 2007 at 5:20 PM
nosha said...: إيمي
نورتي المدونة يا إيمي
الموضوع ده لما نزل يا إيمي قالوا على طول إنها للمؤهلات العليا وللحد من البطالة والنس اللي إنتي بتتكلمي عليهم دول وأنا معاهم وغيرنا كتير أوي مش هنسمح لنفسنا بقلة القيمة والبهدلة دي وإن شاء الله نلاقي شغل يكون من نصيبنا ويعيشنا العيشة الكريمة اللي بنحلم بيها; October 28, 2007 at 5:23 PM
سارة said...: نوشة

والله مش عارفة اقولك ايه

من ناحية المفروض الشغل يبقى على قدر التعليم

ومن ناحية تانية عامل بمؤهل عالى
افضل من قاعد عالقهوة بدكتوراه

عارفة انه ظلم وغلط
بس ايه بقى صح; October 31, 2007 at 2:05 AM
ابو صهيب ( الجمعاوي الاصيل)سابقاً said...: الحكومة تقول لنا
ياشعبي ياحبيبي ياقلبي يابيبي ياحطك في جيبي يابن الحلال
هتقبل هحبك هترفض هلبك هتطلع هنزل هجبل جمال
وسلملي على المترو
صاحب مدونة ميخا; November 2, 2007 at 12:01 AM