أخبار انا مش معاهم : نوشة وشمس يهنئون كل الشعب المصري والمدونين خاصة بقرب حلول عيد الفطر المبارك ويارب يكون العيد كله فرحة وسعادة للناس كلها

Saturday, July 28, 2007

صدقت كلامي يا قلبي


بعد جرحه ليا يا قلبي قلتلي استحمل



ما هو برده حبيبك وروحك فيه




رديت عليك وقلتلك




ده باعنا وخاننا وسابنا أنا وأنت لوحدنا




قلتلي يا قلبي لا مفيش حاجة من الكلام ده أصبر عليا




وأهي فترة وهتعدي ومسيرنا نرجع لبعض بس أصبر شوية عليا




رديت عليك وقلت




أنا اللي يبيع ويخون عمري ما أقدر أستناه ولا أفكر فيه تاني




قلتلي مسير الأيام تثبتلك كلامي




ولما يرجع لحضنك تاني هتقول أنك الغلطان مش أنا




رديت عليك وقلت




على العموم أنا معاك وعمري ما هقدر أسيبك




بس لازم تعرف يا قلبي




أنك كده كده خسران وبتجري ورا سراب مالهوش آخر








وعدت الأيام يا قلبي ومرت الشهور




ودلوقتي بس أنت أتأكدت وصدقت كلامي




خلاص يا قلبي أنسى وفكر بواقعية




خلاص كل حاجة راحت لحالها




وهو ما صدق أنك بعدت عنه لأنك كده كده مش فارق معاه




ولا أنت حتى في دماغه




عارف ليه




لأنه عمره ما قدر حبك وإخلاصك




وعمره ما صانك وحس بيك




وأنت يا مسكين عمال تدي من غير حساب




وتديله الحب والحنان وكل حاجة حلوة




لكنه للأسف




ميعرفش معنى الحب




ولا يعرف حتى إزاي يحب




ولا حس في يوم باللي انت عملته معاه








على العموم يا قلبي أنا مش زعلان منك




ولا هلومك على اللي حصل




بس صاحبك عقلي كان صح




وأنا غلطان أني مسمعتش كلامه




ودلوقتي لازم أقولك أوعى في يوم تغدر أو تخون




وتحاول تنتقم و تخلص اللي حصل معاك




لأن الانتقام والغدر و الخيانة مش طباعك و مش ليك




بس مش معنى كلامي أنك تبقى ضعيف




أنا عايزك قوي وأقوى من الأول كمان




وأنا وأنت وصاحبك عقلي لازم نكون مع بعض على رأي واحد




وعمرنا ما نختلف أبداً لأننا من غير بعض هيبقى كل واحد فينا تايه




ونرجع لنفس الحكاية




وفي الآخر كل اللي هقدر أقوله ليك حاجة واحدة بس




هي




صدقت كلامي يا قلبي




أنا طبعاً عارف أنك مش مصدق




لأنك أنت مش معاهم








NOSHA

Monday, July 23, 2007

الحب من وجهه نظر مختلفة



الحب من وجهه نظر مختلفة

تساءلت كثيرا ما هو الحب ؟ و لماذا تحب هذه دون غيرها ؟
هل أحببتها لأنها أجمل بنات الأرض ؟ بالتأكيد لا
هل أحببتها لأنها ارق بنات الأرض و أكثرهم إحساسا و رومانسية ؟ بالتأكيد لا
و لكن و لأني يجب أن أكون متفهم للأسباب حاولت أن أضع نفسي مكان ذاك المحب أو المحبة و اسأل نفسي لماذا أحببت ؟
و وجدت الإجابة شريعة بل و مقنعة أيضا و عن خبرة بقصص الآخرين لقد أحببتها لأنها أتت في الوقت المناسب أحببتها لأنها احتضنتني في الوقت الذي أحسست بنفاذ الحب من هذا الكون
هل معنى هذا أن الحب مرتبط بالظروف أي إني لو قابلت غيرها في نفس ذات الوقت الذي أحببتها فيه كان يمكن أن أحب غيرها
إذن هل لو مرت بي نفس الظروف و قابلت غيرها يمكن إن أحب غيرها
اذن استطيع القول بان قلبي قابل للحب من جديد
نعم إذا سألتني هذا السؤال " هل قلبي يمكن ان يحب ثانية ؟ " تكون الإجابة بكل ثقة نعم
و على رأي المثل
هو اللي خلقها مخلقش غيرها ؟؟؟؟؟!!!!!
------------------------------
شمس الزناتي

-----------------------------

Saturday, July 14, 2007

لأول مرة في المدونات المصرية و العربية



اول مفاجأة تفجرها مدونة انا مش معاهم على المدونات المصرية و العربية

مفاجأتنا هي .............

--

-

--

-

-

-

-

-

-

-

-

-

-

-

استنى مستعجل لية

-

-

-

-

-

-

-

-

-

المفاجأة

مستشارك القانوني على مدونة انا مش معاهم

الاستاذ/ مدحت رفاعي

المحامي

اسئل و هو يجيب في خلال 48 ساعة


مع تحيات

---------------------

Tuesday, July 10, 2007

الحب اصدار 2007


الحب اصدار 2007


version no.# 2007

هتقولي اية القضية

اية يا عم شمس التقليعة الجديدة دي

اقلك لا تقليعة و لا حاجة اسمعني للاخر

كل الموضوع شاب زيي و زيك صاحبي كان قاعد معايا مرة و قلي انه كلم بنوته على النت و سمع صوتها مرة واحدة

و معجب بيها قلت عادي

بعد فترة قابلته و حكالي انه كل يوم بيكلمها على النت و انه حبها و هي بتحبه

يا نهار اسود

منين يا بني

انت شوفتها

قابلتها

عرفتها

عرفت اهلها مين ماضيها اية حاضرها اية مستقبلها اية

مفيش حبها و خلاص

بيني و بينكوا انا قلت الواد بقى مراهق

لكن المفاجأة ان بالايام بسمع الموضوع دة من شباب و بنات كتير

معقول!!!!!!!!!!!!!!!!!!!!

معقول دة يعني انا ممكن يجيي يوم علية و اقول انا حبيت انسانة ضفتها على الماسنجر ينفع

مش عارف

طب انت ينفع يحصل معاك او معاكي كدة مش عارف

انا سايبلكوا التعليق



---------------------------


---------------------------

Friday, July 6, 2007

لحد أمتى ؟؟؟


لحد أمتى هتفضل نفوسنا مش صافية مع بعض ؟؟؟

لحد أمتى هيفضل الجشع والطمع جوانا ؟؟؟

لحد أمتى هنفضل بعيد عن بعض وكل واحد فينا في وادي تاني

وماشي في حاله وبيفكر في نفسه ومصلحته بس ؟؟؟

لحد أمتى هنفضل نقول طيب ونعم وحاضر وأوامر سيادتك ؟؟؟

لحد أمتى هنفضل متفرقين وعمرنا ما نتفق على رأي واحد ؟؟؟

لحد أمتى هنفضل ساكتين على الظلم والقهر والتعذيب ؟؟؟

لحد أمتى هتفضل السلبية واللامبالاة جوانا ؟؟؟

وبعد كل ده بقى عايزين نبقى أحسن

عمرنا ما هنبقى أحسن إلا لما نعرف

إزاي نحب بعض

ونخاف على مشاعر بعض

وكلمتنا تكون من رأينا ودماغنا

ونقف أدام أي حد ونقول كلنا لا لكل حاجة مش عايزينها

نقول لا للظلم والقهر والتعذيب

نقول لا للسلبية واللامبالاة

أنا لوحدي مش عارف أمتى

لأن أنا مش معاهم

Thursday, July 5, 2007

مش عارف مالي ؟؟؟


عندي شعور غريب مش قادر أوصفه ما بين الحب والغيرة والخوف والإحساس بالخيانة

بحن ليها دائماً ومش قادر اتخيلها مع واحد غيري

وخايف أني أرجع ألاقي نفس الحكاية

ألاقي الغدر والخيانة

ألاقي الحب من ناحيتي أنا بس

طبعاً ده إحساسي لوحدي

بس المشكلة أني كل قلبي بيقولي أرجع

بس فكري وعقلي وخوفي بيمنعوني أني حتى أفكر في الرجوع

ياترى ممكن مين يتغلب على مين ؟؟؟

فكري وعقلي ............ ولا ............ قلبي وحبي

بحبها حب مالهوش حدود ولا ليه آخر

بحبها بكل كياني وهي كل حياتي

بس إحساس الغدر والخيانة جوايا بيقولي أبعد وأنسى اللي ناسيك

فكر في اللي جاي وأبعد عن ماضيك

ماضيك اللي جرحك وخانك وسابك وحيد مع أحزانك

يا ترى أبعد وأنسى ................. ولا ............. أقرب وأدافع عن قلبي وحبي

أنا بجد محتار وفي تناقض كبير فكري وعقلي وقلبي مشغولين

وكل حاجة فيهم في وادي

مش قادر أفكر أو آخد قرار بين قلبي وفكري وعقلي

مش قادر آخد قرار أو أكون مع مين

لأن المرة دي بقى أنا معاهم

Tuesday, July 3, 2007

سنفكر قبل أن نقرر



سنفكر قبل أن نقرر


مش عارف اذا كان من حقي اتحدث باسم الشباب و لا لأ لكن انا تصورت لو طلب مني ذات يوم ان اتحدث باسمهم ماذا اقول
حقيقة إحنا مبنأيدش حد و لا مع حد ضد حد

لكن إحنا بنكرة العنف

نكرة اللي يطعنا في دينا أو شرفنا أو أرضنا

و قبل مانكره او نحب إحنا محتاجين حاجات كتير تكون موجودة جوانا

قبل ما نقول أية صح و أية غلط إحنا محتاجين نحاسب نفسنا قبل ما نحاسب غيرنا

محتاجين نعرف ما علينا قبل أن نعرف ما لنا

محتاجين نقول لأ لما نكون عايزين نقول لأ

محتاجين نقول نعم لما نكون عايزين نأيد

محتاجين منبقاش تابعيين لحد

محتاجين نقول اللي جوانا إحنا منغير من نخاف حد

اللي جوانا إحنا مش جوة حد تاني

محتاجين نقول سلام يعني سلام ؛ يعني السلام في وقت السلام مع ناس تستاهل السلام مع ناس تعرف السلام ؛

ومحتاجين نرفع السلاح في وش ناس متعرفش إلا قوانين البلطجة

دة اللي محتاجينوه قبل ما نقرر هنعمل اية

محتاجين نفكر عشان منبقاش معاهم
-----------------------

شمس الزناتي

----------------------


GOOGLE